Lukas 22:12-31

¹²Iwe, epwe aiti ngenikemi eu ruum mi watte a nom asan, a fen wes le molotä pisekin lon. Ikenan oupwe amolätä meinisin.”

¹³Nge lupwen ar feila ra küna meinisin usun mine Jesus a fen üreniir. Iwe, ra amolätä ewe mongön Pasofer lon ewe leni.

¹⁴Iwe, lupwen a tori ewe fansoun, Jesus me ekewe chon kaiö ra mot ngeni chepel.

¹⁵Iwe, a üreniir, “Ngang üa fokun mochen ach sipwe mongöfengen ei mongön Pasofer mwen ai üpwe tolong lon riaföü.

¹⁶Pun üpwe ürenikemi, pwe seni ikenai üsap chüen mongö ei mongö tori epwe unusen pwönüetä wewen lon Mwün Kot.”

¹⁷Mürin Jesus a angei ewe kap, a iotekin kilisou ngeni Kot won o a apasa, “Oupwe angei ei kap o ünfengen ämi meinisin.

¹⁸Üpwe ürenikemi, pwe seni ikenai üsap chüen ünümi seni ei wain tori wareton ewe Mwün Kot.”

¹⁹Mürin a angei eföü pilawa o a iotekin kilisou ngeni Kot won, a kini o ineti ngeniir o apasa, “Iei inisi üa fangela fän itemi. Oupwe föri ei pwe oupwe chechemeniei.”

²⁰Pwal ina chök usun, a ngeniir ewe kap mürin ar mongö o apasa, “Ei kap än Kot we pwon mi fö mi fis ren chai a ninnila fän itemi.

²¹Nge nengeni, ätewe epwe afangamäei a nom rei arun ei chepel.

²²Pun Nöün Aramas epwe mäla usun Kot a fen apwüngala, nge feiengauen ätewe epwe afangamä i.”

²³Mürin ra popuetä le aisfengen lefiler iö me leir epwe tongeni föri ei sokun föför.

²⁴Iwe, a fis eu aninifengen lefilen ekewe chon kaiö won iö leir aramas repwe ekieki pwe a lap seniir meinisin.

²⁵Jesus a üreniir, “Ekewe kingen chon lükün Israel a wor ar nemenem won aramas, nge chokewe mi wor maner won aramas ra püsin aita ngeniir ‘Chon Alisi Aramas.’

²⁶Nge esap iei usun lefilemi. Pun ewe mi lap leimi epwe usun chök ewe mi kis, nge ewe eman mi nemenem epwe usun chök eman chon angang.

²⁷Iö a lap, ätewe mi mot ngeni chepel are ätewe mi angang ngeni mongö? Ifa usun, esap ätewe mi mot ngeni chepel a lap? Nge ngang üa usun eman chon angang leimi.

²⁸“Ämi oua etiei lon ai kewe riaföü meinisin.

²⁹Usun Semei a ngeniei ai üpwe nemenem, iei usun üpwe pwal ngenikemi ewe nemenem.

³⁰Oupwe mongö o ün won ai chepel lon mwüi, oupwe pwal mot won ekewe lenien motun king o nemeni ekewe engol me ruu ainangen Israel.

³¹“Simon, Simon, nengeni, Satan a angei an mwümwütä pwe epwe sotunikemi, epwe mworeikemi usun aramas ra mworei föün wiich, pwe pöör epwe imwü seni föün.