Luk 22:12-31

¹²Endekɔ-mentər’un kəlɔ kəroŋ, dukəlɔ dɔpɔŋ kɔ ca yɔkɔ pəmar mɔ fəp. Dəndo kəfo kaŋkɔ kɔ nəŋkɔlompəs yeri ya Pak.

¹³Kɔ afum aŋɛ ŋaŋkɔ, kɔ ŋaŋkɔ ŋabəp ca fəp pəmɔ tɔkɔ Yesu ɛnaloku ŋa ti mɔ, kɔ ŋalompəs yeri ya Pak.

¹⁴Ntɛ tɛm tɛmbəp mɔ, kɔ Yesu ɛndɛ dɛmɛsa kədi yeri kɔ Asom ɔn.

¹⁵Kɔ Yesu oloku: «Pəmbas’im kədi yeri ya Pak yayɛ kɔ nəna, a idetɔrɔ.

¹⁶Bawo ic-lok’un, ifɔsɔ-di yi, haŋ tɛm ntɛ teta yi tendekɔ-larɛ nde dɛbɛ da Kanu dəntɔf mɔ.»

¹⁷Kɔ Yesu ɛlɛk apɔt, k’okor-koru Kanu, k’oloku: «Nəlɛk apɔt nŋɛ, nəyerɛnɛ pedisrɛ pa ŋi;

¹⁸bawo ic-lok’un, ifɔsɔ-mun wɛn haŋ dɛbɛ da Kanu deder.»

¹⁹Kɔ tɛyɛfɛ day, k’ɛlɛk kəcom, ntɛ elip kəkor-koru Kanu mɔ, k’entepi ki, k’ɔsɔŋ ŋa pəc-loku: «Dis dem dɔ dandɛ, ndɛ asɔŋɛ te tonu mɔ; nəde nəc-cɛm-cɛmn’em.»

²⁰Ntɛ ŋalip kədi yeri mɔ, k’ɛlɛk sɔ apɔt, k’ɔsɔŋ ŋa, pəc-loku: «Apɔt ŋaŋɛ ŋɔyɔnɛ kəcaŋəs kəfu kəyi ka tes tin kɔ Kanu. Wɛn wawɛ weyi apɔt ŋaŋɛ disrɛ mɔ, wɔyɔnɛ mecir mem mmɛ aloŋɛ tes tonu mɔ.

²¹Ti disrɛ, fum nwɛ endesɔŋ’im padif mɔ, ɛndɛ nnɔ amɛsa ŋaŋɛ kɔ ina.

²²Wan ka fum ɛntas, pəmɔ tɔkɔ aloku ti mɔ; mba pəlɛc peyi fum wəkakɔ endesɔŋ kɔ padif mɔ.»

²³Kɔ acɛpsɛ a Yesu darəŋ ŋayɛfɛ kəyifətɛnɛ dənda, fum nwɛ eyi ŋa dacɔ nwɛ endesɔŋ kɔ padif mɔ.

²⁴Kɔ kəgbɛkəlɛnɛ kəpɔŋ kəyɛfɛ acɛpsɛ a Yesu darəŋ dacɔ, teta kəcərɛ ka nwɛ eŋcepər ŋa dacɔ fəp mɔ.

²⁵Kɔ Yesu oloku ŋa: «Abɛ a tɔf ŋayi afum aŋan kəroŋ pəmɔ abɛ, aŋɛ ŋaŋkɔtɛnɛ kətam nnɔ ŋayi mɔ, ŋafaŋ a pawe ŋa «abɔt a afum».

²⁶Bafɔ tin tayi tɔ kɔ nəna! Mba mɛnɛ nwɛ eŋcepər’un fəp mɔ, pəyi pəmɔ nwɛ ɛfɛtɛ nu dacɔ fəp mɔ; nwɛ ɔyɔnɛ wəbɛ mɔ, pəyi pəmɔ wəcar.

²⁷Bawo, nwɛ eŋcepər nu mɔ ɔyɔnɛ, nwɛ ɛndɛ dɛmɛsa mɔ ba, ka nwɛ ɛŋkɛrɛ kɔ yeri dənda mɔ? Bafɔ nwɛ ɛndɛ dɛmɛsa mɔ ɔfɔ? Kɔ ina, iyi nu dacɔ, pəmɔ nwɛ ɛŋkɛrɛ nu yeri dɛmɛsa mɔ.»

²⁸«Nəna ɛnasiməs kɔ ina tɛm ntɛ inayi tɔrɔ disrɛ mɔ.

²⁹Itɔ ɔsɔŋɛ ntɛ papa kem ɔsɔŋ’im dɛbɛ mɔ, ina sɔ isɔŋ’un di:

³⁰Ntɛ tɔŋsɔŋɛ nədi yeri, nəmun amɛsa ŋem kəroŋ nde dɛbɛ dem dəntɔf mɔ. Nəndɛ səcɔm sa abɛ kəroŋ, nəboc kiti ka cəsuŋka wəco kɔ mɛrəŋ ca Yisrayel.

³¹Kɔ Yesu oloku Simɔŋ Piyɛr: «Simɔŋ, Simɔŋ! Məkɛmbərnɛ! Sentani səntola kədɛs-dɛs’un dəsifitɛ pəmɔ kəcom.