SAN LUCAS 22:12-31

¹²Bra kanꞌ kwaꞌu yu ska kwartu ꞌwan, ska kwartu tlyu nde kwan la nu wa lka ngwa suꞌwe. La kanꞌ kuꞌni xuꞌwe wan siin kanꞌ ―ndukwin Jesús ꞌin neꞌ.

¹³Mdoꞌo neꞌ kanꞌ ndyaa neꞌ bra kanꞌ; sa ñaꞌan nu ndukwin Jesús ꞌin neꞌ chaꞌ ka, ngwañaꞌan ngwa chaꞌ kanꞌ. Bra kanꞌ yꞌni xuꞌwe neꞌ siin seꞌen nu kuꞌni neꞌ taꞌa pascua kanꞌ.

¹⁴Bra wa mdiya bra chaꞌ ku siin neꞌ, ndyaa tukwa Jesús tuꞌwa msaa loꞌo neꞌ nu ngiꞌni xaꞌan chaꞌ ꞌin yu bra kanꞌ.

¹⁵Loꞌo ykwiꞌ yu loꞌo neꞌ kanꞌ: ―¡Ti sꞌni nchka tiǎnꞌ chaꞌ ku siinǎn taꞌa pascua re loꞌo wan, bra nu ti ji kajaǎn! ―ndukwin Jesús―.

¹⁶Nchka tiǎnꞌ katsaǎnꞌ ꞌwan chaꞌ xiyaꞌ ti kuꞌniǐn taꞌa re loꞌo wan sa ñaꞌan bra nu tsaa tii chalyuu, loꞌo bra kanꞌ kuǎn ꞌin ran xiyaꞌ bra nu ka Ndiose ndloo la ꞌin nchga nten.

¹⁷Bra kanꞌ msñi Jesús ska basu mñun, ndyaa yu xuꞌwe ꞌin Ndiose bra kanꞌ. Nde lka chaꞌ nu ykwiꞌ yu loꞌo neꞌ nu ngiꞌni xaꞌan chaꞌ ꞌin yu bra kanꞌ: ―Koꞌo wan mñun nu nsuꞌwi niꞌ basu re, kwiꞌ ngwañaꞌan ta wan mñun re koꞌo nchga neꞌ taꞌa wan ―ndukwin Jesús bra kanꞌ―.

¹⁸Chañi chaꞌ nu katsaǎnꞌ ꞌwan, chaꞌ ja koꞌoǔn ꞌaǎn mñun loꞌo wan sa ñaꞌan bra nu ka Ndiose ndloo la ꞌin nchga nten.

¹⁹Bra kanꞌ msñi Jesús ja xlya, ndyaa yu xuꞌwe ꞌin Ndiose, msuꞌwe yu jaxlya kanꞌ, chaꞌ ta yu ꞌin neꞌ. Bra kanꞌ ykwiꞌ yu loꞌo neꞌ: ―Nde lkaǎn, tyukwi ñaꞌaan ykwiǐnꞌ lka re. Nan wa nda Ndiose Stiǐn ꞌñaǎn chaꞌ kajaǎn chaꞌ ka suꞌwe chaꞌ ꞌwan. Tyaa yuꞌwi tiꞌ wan ꞌñaǎn bra nu ku wan jaxlya re.

²⁰Ti kwiꞌ ngwañaꞌan yꞌni Jesús loꞌo basu kanꞌ bra wa mdyii yku neꞌ. ―Bra nu koꞌo wan mñun re tyaa yuꞌwi tiꞌ wan ꞌin chaꞌ kwi nu wa skanꞌ ti Ndiose loꞌo wan ―ndukwin Jesús bra kanꞌ―. Bra nu kajaǎn lo wsi, bra kanꞌ kalu tneěn chaꞌ ka suꞌwe chaꞌ wan.

²¹’Loꞌo ni, ndiya yu nu kujwiꞌ xuꞌwa ꞌñaǎn yaꞌ neꞌ xaꞌan; suꞌwa ti ndukwaǎn loꞌo yu kanꞌ tuꞌwa msaa re ―ndukwin Jesús bra kanꞌ―.

²²Loꞌo naꞌ nu wa ndijyaǎn chaꞌ kaǎn nten, ndiꞌin chaꞌ tsaꞌaǎn tuwiin seꞌen ndukwin Ndiose Stiǐn chaꞌ tsaꞌaǎn. Bra kanꞌ, ¡tꞌnan ꞌa yu nu wa yjwiꞌ xuꞌwa ꞌñaǎn yaꞌ neꞌ xaꞌan kanꞌ!

²³Bra kanꞌ mdyisnan neꞌ nchkwiꞌ neꞌ loꞌo taꞌa ndukwa neꞌ kanꞌ: ―¿Ti ka lka nu ta ꞌin mstru ꞌñaan yaꞌ neꞌ xaꞌan a? ―ndukwin neꞌ.

²⁴Bra ti mdyisnan neꞌ ngiꞌni siyeꞌ neꞌ loꞌo taꞌa ngiꞌni xaꞌan neꞌ, nchkwiꞌ neꞌ ti ka nu ka ndloo la ꞌin taꞌa neꞌ.

²⁵Laja bra kanꞌ xiyaꞌ ykwiꞌ Jesús loꞌo neꞌ: ―Nchga lo xꞌnan chalyuu, suꞌwe ꞌa ndlo neꞌ tñan ꞌin nten ꞌin neꞌ; nten nu suꞌwe ꞌa ngiꞌni lka nu lka ndloo kanꞌ, ngwañaꞌan nchkwiꞌ neꞌ bra kanꞌ.

²⁶ꞌWan ni, ja ndiꞌin chaꞌ kuꞌni wan ngwañaꞌan loꞌo taꞌa nten wan. Nde ka tñan nu kuꞌni wan suꞌwe la. Bra nu nchka tiꞌ wan chaꞌ ka ndloo la chaꞌ ꞌwan ke taꞌa nten wan, bra kanꞌ ndiꞌin chaꞌ kuꞌni wan sa ñaꞌan si lka wan nu xuwe la ꞌin neꞌ taꞌa wan ―ndukwin Jesús ꞌin neꞌ kanꞌ―. Ngwañaꞌan ꞌwan nu nchka tiꞌ wan kulo wan tñan ꞌin taꞌa nten wan, ndiꞌin chaꞌ kuꞌni wan tñan chaꞌ ꞌin nchga neꞌ taꞌa wan.

²⁷¿Ti ka nu ngiꞌni la chaꞌ ꞌin sikwa a? ¿Nu ndukwa tuꞌwa msaa chaꞌ ku a? ¿O ta msu nu nxku ꞌin yu a? Chañi chaꞌ yu nu ndukwa tuꞌwa msaa, kanꞌ lka nu ngiꞌni la chaꞌ ꞌin, chaꞌ kanꞌ lka xꞌnan neꞌ. Naꞌ ni, sa ñaꞌan si lkaǎn ska msu ꞌwan, ngwañaꞌan ndiꞌiǐn laja wan ―ndukwin Jesús―.

²⁸’ꞌWan ni, wa ndiꞌin wan loꞌoǔn nchga tsan nu ndiꞌiǐn ndijiǐn nu tiꞌí lo chalyuu re,

²⁹kanꞌ chaꞌ taǎn ska tñan suꞌwe nu kuꞌni wan chaꞌ ka wan tñan loꞌoǔn; tñan kanꞌ ka sa ñaꞌan lka tñan nu nda Stiǐn ꞌñaǎn, chaꞌ kaǎn ndloo.

³⁰Loꞌo suꞌwa ti ku wan koꞌo wan loꞌoǔn bra kanꞌ; kwiꞌ suꞌwa ti tyukwa wan loꞌoǔn bra nu kuꞌni biyaǎnꞌ ꞌin nchga nten; loꞌo ngwañaꞌan kuꞌni biyaꞌ wan ꞌin taꞌa nten wan, nu tii tyukwa ta neꞌ Israel taꞌaan.

³¹Bra kanꞌ ykwiꞌ Jesús loꞌo Tyu Simón kanꞌ: ―Simón ―ndukwin―, sa ñaꞌan lka chaꞌ ꞌiin ni, ñaꞌan tiꞌ si wa mjñan Satanás chabiyaꞌ chaꞌ ta nu tiꞌí ꞌin nchga wan; wa nchka tiꞌ yu kuꞌni biyaꞌ yu ꞌwan, chaꞌ xitsen yu ꞌwan. Sa ñaꞌan lka xa nu nskwian mta trigu chaꞌ tyuwi ran, ngwañaꞌan kuꞌni yu loꞌo wan, nchka tiꞌ yu.