LUKA 1:1-13

¹Lohia taumu Teofilo e: hutuma ese ta abi dae herevadia vada e tore,

²matadia amo e ita bona matamana amo e harorolai taudia ese e henidava heḡereḡerena;

³taunabunai lau danu hereva iboudiai vada na tahu ḡoevaḡoeva, matamana amo, bena na tomamu namona binai, lau ma baina tore lou oiemu.

⁴Vada ba diba, e hadibamuiva herevadia be momomo-kakani.

⁵Herod ese Iudea e lohiaiava negana ai, hahelaḡa tauna ta e nohova, ladana na Sakaria, Abia ena orea tauna. Adavana be Aaron ena iduhu hahinena, ladana na Elisabeta.

⁶Idia raruosi na kara maoromaoro taudia Dirava vairanai, Lohiabada ena taravatu bona ena haheḡani iboudiai e badinava, asi toutoudia.

⁷A raruosi na asi natudia, Elisabeta e gabani dainai, bona raruosi vada e buruka.

⁸Sakaria ese hahelaḡa karadia e karava Dirava vairanai, ena orea taudia edia nega ai.

⁹Bena edia kara heḡereḡerena ai ia vada e abia hidi, gabu helaḡana lalonai muramura mai bonana baine gabua; taunabunai ia na e raka vareai muramura igabuna totona,

¹⁰a taunimanima iboudiai na murimuri ai e noho, e ḡuriḡuri.

¹¹Una negana ai, ia ese Lohiabada ena aneru ta e itaia, muramura mai bonana patana idibana kahana ai e gini.

¹²Sakaria ese e itaia, bena kudouna e hetaha, bona gari ese e butua tao.

¹³A aneru ese e hereva henia, eto, Sakaria, asio gari, badina be emu ḡuriḡuri vada e kamonai, adavamu Elisabeta ese natumu ta do baine abia, ladana ba hatoa IOANE.