Luuka 1:1-13

¹Weeyo Tiyoofilu woohishimiwa, atthu a waatta aajilipisiye waatikha hatiithi ya vitthu ziviriyeeyo vakatthi vetthu.

²Apale aari mashaahiti ooniyeeyo omwanzweene zirettikhanaka, khwiiya anamalaleya a hapari zooshapweya za nttakhuzi la Nnyizinku, atthaapo pi anifiseliyeeyo fweeyo.

³Na miiyo zaamu yaka khusala kitholathola woohilazeli varanka epile zirettikhaniyeezo zaazaka, khulakela owaatikhela zooshi woolotteyavo,

⁴yoori wiiyane nroromelo khwa mattakhuzi apa a haakhi osiiliyeeyo.

⁵Wakathi Herooti ari nsatoro wa Yudeya, aarivo haakhimu wa tiini mmote wa khuntti ya Abiiya aari wiitthiwaaye Zakariiya. Muukhaawe aari wiitthiwa Elizabeeti aari woojama wa mahaakhimu a tiini.

⁶Oowiiri aya aari atthu ookhweele nkatthi wa mwentto wa Nnyizinku na ooshututela wa waamineyavo kano na oruma wooshi wa Mbwana.

⁷Elizabeeti khaarina mwaana mwaasa woohiina mavokozi na oowiiri aya aari awuuluvala.

⁸Siikhu moote Zakariiya aari okhola khaazi yoohaakhimu wa tiini Nnyuupa wa Nnyizinku Yeruzaleemu, mwaasa yoori yaari zwaamu ya khuntti yawe okhola khaazi yaya etile.

⁹Nkhama etthiipo aazowereliyeeyo attunkhulu a tiini, ye aathawuliwe nkatthi wa nasipu yoori asala akhoza ovupa puuro ttakatthiifu ya Mbwana.

¹⁰N'oofiya wakathi wookhoza ovupa, atthu ooshi apale aari vaje aari ovira alompaka.

¹¹Aphano nlayikha la Mbwana khunteela Zakariiya nkhono-nlume vaalitaari onkhoziwaavo ovupa.

¹²Wakathi ye ooniyeevo nlayikha ntthile, khwiiya wooshanka na wa woova channu.

¹³Nlayikha khumuuza yoori: “Ohoove Zakariiya! Nnyizinku asiila lompa yawo; muukhaawo Elizabeeti onteela ompattha mwaana. Weeyo onteela ontthaja nzina la Yaahaya.