Lucas 1:1-13

¹Elew Teofilo. Medita den se otaw simolat tepad te neinang dini kenami.

²Se insolat dan, yan se kagi ingkeliwat te menge otaw ontò kimità te kedita te ininang i Jesus lekat te ketebò niyan, so ontò dan kinità se ininang din, aw ingkeliwat dan heman se kagi din diyà kenami.

³Elew, nenamay a den mig-iling te kedita niyan, aw yan se doun te mig-aneng-aneng a den te mèpiya aw somolat a heman diyà kamno te kedita te neinang,

⁴amon ketegahan no te ontò benal se tapay intoladà diyà kamno.

⁵Kedengan, dalem te peglowan i Herod kidoen te probinsya te Judiya, doen sebad pengolo te simbahan te Judiyo ngadan din si Zacarias. Sikandin se sebad pengolo te simbahan sakop te gropo i Abias. Doen esawa din si Elisabet, aw pengolo te simbahan se kemonaan din heman.

⁶Sìyan teleesawa, ontò dan nelubahan te Timanem so metòlid se eg-inangen dan. Wedad palos otaw mekesila kandan so ontò dan egtolò te menge punù te Pengolo.

⁷Wedad palos batà dan, so wedà pegbatà si Elisabet, aw lokes den, aw temoay den se esawa din.

⁸Dimateng se aldaw te pegpengibing i Zacarias te pegsimba, so migpetibos-tibosay se menge gropo te pengolo.

⁹Se ketanem te menge pengolo te simbahan, migbonot dan aw sinu se mawop doton te dakel simbahan amon menonog te metinadeg. Aldaw sìyan, si Zacarias se nepallì.

¹⁰Pegdateng te oras te pegsonog, medita se otaw migtawal-tawal doton te lowà.

¹¹Peg-awop din amon menonog, doen anghil insogò te Timanem migpekità diyà kandin doton te sonoganan te metinadeg lenged te kowanan.

¹²Pegkità i Zacarias kandin, migkebulung se aneng-aneng din aw nelemitan.

¹³Meneng minikagi se anghil, “Zacarias, ikà egkelemitan. Nenenalan se Timanem te intawal-tawal nikaw. Doen batà no meama tomebaw diyà te esawa no, aw keilangan ingedanan no sikandin ki Juan.