LUKA 10:9-32

⁹Edia gorere taudia ba hamauridia, bona ba hadibadia, baoto “Dirava ena basileia na emui ai vada be kaumu”.

¹⁰A ba kau ai basie abimui dae hanuana ariarana amo mai gwaumui ida baola, baoto.

¹¹“Emui hanua ḡahuna aemai ai e hekamo kaumu na a dahu dahu ohomu, umui ihabadelaimui ḡauna ai bainela: ḡau tamona umui ba diba, Dirava ena basileia na vada be kaumu”.

¹²Na hamaoromuimu, hahemaoro dinana ai Sodoma na baine namo, a una hanua be baine dika.

¹³Korasin bona Betesaida, madi ihabaimui! Badina be siahu karadia lalomui ai na karava na Turo bona Sidono lalodiai bama kara, idia na idau nega ai vada bema helalo kerehai, mai davahadia bona mai kahudia ida bema helai.

¹⁴Hahemaoro dinana ai, Turo bona Sidono bae dika maraḡi, a umui na ba dika bada.

¹⁵Oi danu Kaperanaum e, oi na guba ai ba heabi dae a? Lasi, tanobada henunai bae dorimu dobi.

¹⁶Umui e kamonai henimuimu tauna ese lau e kamonai henigumu; bona umui e dadaraimuimu tauna ese lau e dadaraigumu; bona lau e dadaraigumu tauna ese lau e siaigu Diravana danu e dadaraiamu.

¹⁷Hitu-ahui-osi e lou, mai moaledia ida, eto, Lohiabada e, lauma dikadia ese ai eremai e kamonai, oi ladamu dainai.

¹⁸Bena ia ese e hamaorodia, elo, Lau ese Satana na itaia, kevaru na heto, guba amo e moru.

¹⁹Lau eto siahu na henimuimu, gaigai bona doadoa ba moi tao, bona inai tauna ena siahu idoinai danu ba moia tao; bona ḡau ta ese basine hadikamui.

²⁰Ḡau tamona, lauma dikadia ese e kamonai henimuimu na basio moaleIaia; a ina hari ba moalelaia: ladamui na guba ai vada e tore.

²¹Una negana ai Iesu na Lauma Helaḡa bagunai e hisi dae, eto, Tamagu e, guba bona tanobada Lohiana, na hanamomumu, badina be ini ḡau aonega taudia bona lalo-parara taudia edia amo vada o huni, a memero karukarudia ediai vada o hahedinarai. Momokani, Tamagu e, badina be emu lalo-hadai namona benai.

²²Ḡau iboudiai na Tamagu ese vada e henigu: tau na Natuna asi dibana, Tamana mo sibona; bona tau ta Tamana asi dibana, Natuna mo sibona, bona Natuna e uramu baine hahedinarai henia tauna.

²³Bena e roha kerehai, ena hahediba mo sibodia e hereva henidia, eto, Ini ḡau o itamu taumui matamui na vada nanamo;

²⁴badina be peroveta taudia bona hanua pavapavadia hutuma e urava umui o itamu ḡaudia bema ita, to asie itava, bona umui o kamonaimu herevadia bema kamonai, to asie kamonaiva.

²⁵Bena taravatu tauna ta e tore isi, ia e dibaḡania, eto, Hahediba taumu e, ede baina kara toma mauri hanaihanai iabina?

²⁶Iesu eto, Taravatu bukana lalonai ede e torea toma? Ede o duahia toma?

²⁷Ia e haere, eto, Lohiabada emu Dirava ba lalokau henia mai lalomu idoinai, mai laumamu idoinai, mai goadamu idoinai, mai daramu idoinai; bona, Dekemu tauna ba lalokau henia, sibomu o helalokaumu heḡereḡerena.

²⁸Iesu eto, Emu haere na maoro; unu ba kara toma be ba mauri.

²⁹A ia be sibona e hekikwo, bena ma e henanadai, eto, Lau dekegu tauna be daika?

³⁰Iesu ma e haere, eto, Tau ta Ierusalem amo Ieriko e laova ai na dadidadi taudia haida ese e davaria; bena ena dabua e dadihai, e dadabaia, mokona e mase, bena e rakatania.

³¹Hahelaḡa tauna ta ena laolao una dala amo ela; hari tau e itaia, to e rakaia hanai.

³²Levi oreana tauna ta danu unuheto, una gabu ai e kau, e itaia, to ma e rakaia hanai.