LUKA 10:9-32

⁹A dang lypaw sahlo khah dang sá la, Khazing painah raang tah a ca ne my ca he, tatah ching my lo.

¹⁰Canghrasala, khuachung a nae he ceh ka, ingtlung aa ca pa-awng ly caco he, langlaipui sahlo lekhei sei la, ma hrahei tah my lo,

¹¹‘Naa khua luipadih kaa phe letei a kapaw hmai kaa cathingthlah hi, ma duitei cawh ma heh hnih my lo. Khazing painah raang cawh a ne myca,’ tatah tah my lo.

¹²Ma heh ka ca ching he, biacenah ning taco ma khua navy co Sodom khua tai-ingnah hmai khah a zia a ung vy a.

¹³Vy Korazin khua na cing a ping! Vy Bethsaida khua na cing a ping! Naaning letei tuapaw ningang chuipaw hming khah Tair le Sidon khua letah tuapaw cang he seh la, buri pai a buh a tah mecang letah a ty a he ka, a ngepachih syly tha he a.

¹⁴Canghrasala, biacenah ning leco Tair le Sidon khua tei aa ingpaw cawh naaning navy tah a zia a ung vy tae a.

¹⁵Taico, nama Kapernaum khua, avai tai kheh calia na cang maw? Cang bei ceh. Hraihming lang na tlahthlah a.

¹⁶Naa rei a ca ngepaw maikaw he cawh kama ka rei a pa ngepaw a cang he. Naaning a ca hlawhpaw maikaw he cawh kama a pa hlawh paw a cang he. Canghrasala kama a pa hlawhpaw maikaw he cawh a pa tawtu a hlawhpaw a cang he,” a tah he.

¹⁷Songsarih le pahning tlaw he khah lunglawng teitah va tlung kaw he ka, “Abuipaw, khachia vanghru sahlo zong tahmai na ming tah kaa rei aa ma nge,” tatah aa ching.

¹⁸Zisu tah, “Setan khah lailaw hratah vaicung taitei a za tlahthlahpaw ka hmuh.

¹⁹Pari sahlo le tlangcekawng sahlo zong tlaipabainah naw le naa caraepaw te khynah naw ca pei he neh ka, zetahmai a ca sawsah khy bei he.

²⁰Ma duitei cawh thlawpaw pialuipaw zong tah naa rei aa ca nge caw he tah a lawng khe o. Canghrasala vaicung letah naa ming cia a cangnah cawtah a lawng hri my lo,” tatah a palei he.

²¹Ma ningcai leco Zisu cawh Thlawpaw Pathai thongtah a lawng ngetei ka, “Ka Paw, alui le avai Buipaw, ka ca reithai, mehthai mehsing sahlo caw taco, ma hming sahlo heh nawh ceh ka, nyheh hapaw sahlo khatah na palang. A cang, ka Paw, ma cawh nama na lawngnah cawh a cang,” a tah.

²²Zisu cawh ma hratei thlaw a chang khy taico zawpui sahlo lang cawh ma hrahei bia rei ka, “Hming vytei heh ka Paw tah a pa peh thlu thah he. Paw tah ly co Sawcapaw heh ahomaw a cang tahpaw ahotahmai hnih bei he. Taico, Sawcapaw le Sawcapaw tei hnisah rua pawtah a thingpaw he tah ly co Paw cawh ahomaw a cang tahpaw ahotahmai hnih bei he,” a tah.

²³Mataico, a hningzuitu sahlo lang khah a hui ka, aaning ei teitah ching he ka, “Naa hmuhpaw hming a hmuhpaw mehkho sahlo cawh bonghnang aa ting.

²⁴Biahmuisui ka ca ching he, Khazing khuavang le abui sahlo mehlupui tah naa hmuhpaw heh hmuh aa du ngetei cy hrah naná teitah hmuh bei he. Naa thuipaw heh thui aa du ngetei hrah naná teitah za thui bei he,” tatah a tah he.

²⁵Uikheh cawh phungbia a thai ngeteipaw pakheh cawh Zisu pase du tah a daw ka, “Cawngpahtu, chaizaw hringnah ka hmuh khy nápawtah zemaw ka tua a?” tatah a hae.

²⁶Zisu tah, “Khazing phungbia letah zemaw a cia? Zekhatamaw na hni?” tatah a hae hri kaw.

²⁷Phungbia a thai ngeteipaw taco, “ ‘Abuipaw na Khazing khah na lungthing vytei, na hringnah vytei, na thawzaang vytei le na khuarawnah vytei tah do my lo.’ Mataico, ‘Nama na dopaw hratah na ingpaw khah do my lo,’ tahpaw he a cang,” tatah a chai.

²⁸Zisu tah, “Na pachaipaw ahmang ngetei, ma hraco va tua la, na hring a,” a tah.

²⁹Canghrasala, ama teitah thai a cangsah khah a dunah cawtah, “Ka ingpaw cawh ahomaw a cang?” tatah a hae kaw.

³⁰Zisu tah palei ka, “Cawngsaw pakheh Jerusalem khua taitah Jeriko khua lang a seithlah. Ma langpui leco damia sahlo tah hrawh he ka, a caise vytei pahlu pah thlu he ka, thi daimang tah aa dai khy taitah aa seisai.

³¹Tlangbui pakheh cawh ma lang a za sei hrah ning khatah a tong ka, damia sahlo tah aa daipaw cawngsaw khah a hmuh tihtah khungsai ka, lang kang rakheh lang tah a cahri.

³²Ma paw hraco Levi mingphing pakhehpaw tah ma hminghmaw cawh va phah hrah ka, a hmuh tihtah khungsai ka, langkae lang co a cahri sai thlang hrah.