Luka 10:9-32

⁹ma aŋgôm lau gêmac, taŋ sêmoa malac tau naŋ, ôliŋ ŋajam êsa to asôm êndêŋ êsêac gebe ‘Anôtônê gamêŋ kêdabiŋ amacgac.’

¹⁰Ma embe asa malac teŋ e sêkôc amac sa atom, go aêc mêŋako intêna ma asôm gebe

¹¹‘Amacnêm malac ŋakekop, tec gi aêac eŋkaiŋ nec, aêac êndôŋ su wacêpi amac taôm. Mago biŋ tonec ajala gebe Anôtônê gamêŋ kêdabiŋ su.’

¹²Aê jasôm êndêŋ amac gebe Êndêŋ bêc Anôtô êmêtôc biŋŋa lau Sodom oc sêŋgôŋ naeo êtôm lau malac tonaŋŋa atom.

¹³“Ojae Korasinma, ojae Betsaidama. gêŋtalô taŋ gagôm aŋga amacnêm naŋ, embe jaŋgôm aŋga Turu to Sidon nêŋ, oc sênam tauŋ ôkwi wanêcgeŋ ma sêsô talu to sêliŋ wao sa sêŋgôŋ.

¹⁴Êndêŋ bêc mêtôcŋa Anôtô taê walô lau Turu to Sidon êlêlêc amac su.

¹⁵Ma aôm Kapanaum tonaŋ, gobe sêsuŋ aôm sa e nadiŋgeŋ undambê me. Aôm oc u taôm e gacgeŋ ôsêp lamboam ôna.”

¹⁶Ma Jesu kêsôm gêdêŋ nê ŋacseŋomi gebe “Ŋac taŋ gêŋô amac naŋ, gêŋô aê, ma ŋac taŋ kêmasuc amac naŋ, kêmasuc aê. Ma ŋac taŋ kêmasuc aê naŋ, kêmasuc ŋac, taŋ kêsakiŋ aê gamêŋ naŋ.”

¹⁷Lau 70 sêmu sêmêŋ kêtiam totêntac ŋajamgeŋ ma sêsôm gebe “Apômtau, ŋalau sec taŋeŋ wamu gêdêŋ aêac gêwiŋ kêtu aômnêm ŋaêŋa.”

¹⁸Ma Jesu kêsôm gêdêŋ êsêac gebe “Aê galic Sadaŋ tau gêu tau aŋga undambê amboac ôsic.

¹⁹Alicgac me, aê kakêŋ ŋaclai gelom amac gebe aka moac to alidêbu ma akôniŋ ŋacjo tau nê ŋactêkwa samob tôŋ, ma gêŋ teŋ oc êŋgôm amac atu sec atomanô.

²⁰Tageŋ atu samuc êtu ŋalau sec taŋeŋ wamu amacŋa nec atom, atu samuc gebe teto amacnêm ŋaê gêc undambê.”

²¹Gêdêŋ ŋasawa tonaŋ Ŋalau Dabuŋ gêjam Jesu auc e têtac ŋajam kêsa ma kêsôm gebe “Tamoc, undambê to nom Ŋatau, aê jalambiŋ aôm gebe gôsaŋ biŋ tônê auc gêdêŋ laumêtê to lau tokauc ma goc lasê gêdêŋ ŋacpalê dedec. Aec, Tamoc, biŋŋanô, aôm gôlic ŋajam amboac tonaŋ, tec gôgôm nêm gêŋ.

²²“Tamoc kêkêŋ gêŋ samob gêdêŋ aê. Ma ŋac teŋ kêjala Latu atom, Tama taugeŋ. Ma teŋ kêjala Tama atom, Latu taugeŋ to êsêac, taŋ Latu gebe eoc lasê êndêŋ êsêac naŋ.”

²³Go kêsa tau ôkwi mêŋkêsôm gêdêŋ nê ŋacseŋomi tauŋgeŋ gebe “Aê aoc êôc mateŋanô, taŋ sêlic gêŋ ônaŋ amac alic naŋ,

²⁴gebe aê jasôm êndêŋ amac gebe Propete to kiŋ gwalêkiŋ sebe sêlic gêŋ, tec amac alic nec, mago sêlic atom to sebe sêŋô biŋ, tec amac aŋô nec, mago sêŋô atom.”

²⁵Biŋsutau teŋ gêdi sa gebe ênsaê eŋ, tec kêsôm gebe “Mêtêmôkê, aê jaŋgôm asageŋ, ec jawê kaiŋ jaŋgôŋ matoc jali teŋgeŋ.”

²⁶Jesu gêjô eŋ awa gebe “Teto biŋ ondoc gec Mosenê biŋsu. Aôm kôsam amboac ondoc.”

²⁷Tec ŋac tau kêsôm gebe “Têmtac êwiŋ Apômtau, aômnêm Anôtô, tonêm ŋalêlôm samuc ma nêm katôm samuc ma nêm ŋaclai samuc ma nêm kauc samuc êwiŋ eŋgeŋ, ma têmtac êwiŋ lau wacbaŋ aôm amboac têmtac gêwiŋ taôm.”

²⁸Ma Jesu kêsôm gêdêŋ eŋ gebe “Kôsôm jagêdêŋ. Ôŋgôm amboac tonaŋgeŋ, go ômoa matam jali teŋgeŋ.”

²⁹Ŋac tonaŋ gebe êwaka tau sa, tec kêtu kênac Jesu gebe “Lau ondoc mêŋbaŋ aê.”

³⁰Go Jesu gêjô eŋ awa gebe “Ŋac teŋ aŋga Jerusalem kêsêp Jeriko gêja e kêsêp kêjaŋgowaga ŋalêlôm. Êsêac sêkwalec ênê ŋakwê su ma sêjac eŋ gêwê siŋ sa ma sêc sêja.

³¹Gocgo ŋac dabuŋwaga teŋ gêjam kauc ŋac tonaŋ ŋabiŋ kêsêlêŋ kêsêp intêna tonaŋgeŋ gêja e gêlic ŋac tau gêc ma gêôc lêlêc eŋ gêja.

³²Ma Lewi teŋ amboac tonaŋgeŋ. Mêŋgêô lasê gamêŋ tau e gêlic eŋ su ma gêôc lêlêc eŋ gêja.