9Oupwe apöchöküla ekewe chon samau lon ena telinimw o üreni ekewe aramas mi nom lon, ‘Mwün Kot a arapoto remi.’
10Nge are oupwe tolong lon eu telinimw, nge resap etiwakemi, oupwe feila won ekewe al o apasa,
11‘Ewe mwo pwülün lon ämi telinimw mi pachetä fän pechem aipwe wichiki ngenikemi, pwe eu minen pwärätä ngenikemi. Nge oupwe silei pwe Mwün Kot a arapoto remi.’
12Üpwe ürenikemi, pwe lon ewe ränin kapwüng epwe kisikis feiengauen Sotom seni feiengauen ei telinimw.
13“Feiengauom Korasim, feiengauom Petsaita! Pun are ekewe manaman mi fen fis lomi ra fis lon Tirus me Siton, ekewe aramas lon ekei telinimw repwe mottiu me lomlom fän üfer seni tuk o amworatiu falang won mökürer pwe asisilen ar aier seni tipis.
14Lon ewe ränin kapwüng epwe kisikis feiengauen Tirus me Siton seni ämi feiengau.
15Nge en Kapernaum, ka ekieki pwe kopwe püsin atekiokotä tori läng? Apwi, sap ina, kopwe turutiu lon hell!”
16Iwe, Jesus a üreni nöün kewe chon kaiö, “Iö a aüselingakemi a aüselingaei, nge iö a aliwinikemi, a aliwiniei, nge iö a aliwiniei a aliwini ewe mi tiniei.”
17Iwe, ekewe fik me ruoman ra liwinto fän pwapwa chapur. Ra üreni Jesus, “Äm Samol, ekewe anün rochopwak mwo nge ra aleasochisikem, lupwen aia allük ngeniir fän itom.”
18Nge Jesus a pölüeniir, “Üa küna Satan pwe a turutiu seni läng usun chök fifi.
19Oupwe rongorong! Ngang üa ngenikemi manaman, pwe oua tongeni puri ekewe serepenit me mönükam, oupwe pwal pworaiti manamanen ewe Chon Oput. Iwe, esap wor och epwe tongeni afeiengauakemi.
20Nge ousap pwapwa pwe ekewe ngününgau ra aleasochisikemi, nge oupwe pwapwa pwe itemi a mak lon läng.”
21Iwe, lon ewe fansoun Jesus a uren pwapwa ren Ngünmifel o a apasa, “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate. Ewer, Semei, pun iei usun letipom.”
22“Semei a anomu mettoch meinisin fän nemeniei. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”
23Mürin Jesus a kul ngeni nöün kewe chon kaiö o üreniir lupwen ra imwüela, “Feiöchün chokewe mi küna mine ämi oua küna.
24Pun üpwe ürenikemi, pwe chomong soufos me king ra mochen küna met ämi oua küna, nge resap tongeni. Ra pwal mochen rongorong met ämi oua rongorong, nge resap tongeni.”
25Iwe, eman Sensen Allük a feito ren Jesus pwe epwe sotuni. A aisini, “Sense, met ngang üpwe föri pwe üpwe manaueni manau esemuch?”
26Jesus a pölüeni, “Met a mak lon ewe Allük? Met ka aleani?”
27Iwe, ewe mwän a pölüeni, “Kopwe echeni ewe Samol om Kot ren unusen lelukom, ren unusen ngünum, ren unusen tufichum me unusen ekiekum. Kopwe pwal echeni chon arum usun püsin om echenuk.”
28Iwe, Jesus a pölüeni, “Mi pwüng mine ka apasa. Iei usun mine kopwe föri, iwe, kopwe manau.”
29Nge ewe Sensen Allük a mochen pwärala pwe i mi pwüng, iei mine a üreni Jesus, “Iö chon ori?”
30Iwe, Jesus a pölüeni, “A wor eman mwän a feil seni Jerusalem pwe epwe feitiu Jeriko. Lupwen a fetal won al, ekoch chon solä ra säwu o turufi, ra angei pisekin meinisin, ra awata o likitala pwe a arap ngeni mäla.
31Iwe, a fis pwe eman souasor a fetaleto won ewe al. Nge lupwen a küna ewe mwän mi feiengau, a rik seni o fetal won ewe al me epek.
32Pwal ina chök usun eman mwän seni ewe ainangen Lefi. Lupwen an pwerela ewe ie, a pwal küna ewe mwän, nge a rik seni o fetal won ewe al me epek.