1Ämi samol kana, oupwe aramasöch o eäni pwüng ngeni nöümi amanau. Oupwe chechemeni pwe mi pwal wor ämi Samol lon läng.
2Oupwe likitü o mamasa lon ämi iotek, oupwe pwal iotekin kilisou ngeni Kot.
3Oupwe pwal iotek fän item pwe Kot epwe suki eu asam ngenikem, pwe aipwe tongeni afalafala an kapas usun ewe monomonen Kraist. Pun iei popun pwe üa nom lon imwen fötek.
4Iei mine oupwe iotek pwe mine üa eäni afalafal epwe fatöch, usun a pwüng ngeni wisei.
5Oupwe eäni tipachem lon ämi föför ngeni chokewe resap lükü, oupwe alomotöchü ämi fansoun.
6Ämi kapas epwe pwetete o apwapwai aramas, iwe, oupwe silei mine oupwe pölüeniöchü ngeni aramas meinisin.
7Tikikus pwiich we mi achengicheng, i eman chon angang mi allükülük me chienem chon angang lon angangen ach Samol, epwe apworausa ngenikemi usun pworausei meinisin.
8Ina popun üa tinala i remi pwe epwe apöchöküla letipemi ren an apworausa ngenikemi usun mine a fis ngenikem.
9Iwe, Onesimus pwiich we mi achengicheng me allükülük epwe eti Tikikus le feila remi, ätei i eman chon ämi mwich. Ätekei repwe apworausa ngenikemi mine a fis me ikei.
10Aristarkus chienei chon fötek a tinala an kapong ngenikemi, pwal Markus pwiin Parnapas. (Oua fen angei ekewe kapasen öüröür usun ämi oupwe etiwa Markus are epwe feito remi.)
11Josua mi pwal iteni Justus a pwal kapong ngenikemi. Ätekei me ülüman ir chök me lein ekewe chon Juta mi soulängila, ra etiei lon ewe angang fän iten ewe Mwün Kot, a fokun watte ar alilis ngeniei.
12Kapong seni Epafras, pwal i eman chon ämi we mwich me eman nöün Kraist Jesus chon angang. A fokun achocho le iotek fän itemi o tüngor ngeni Kot an epwe anükücharakemi, pwe oupwe mirit lon ämi souläng, nge ousap tipemwaramwar, oupwe pwal fokun aleasochisi letipen Kot.
13Püsin ngang üa tongeni pwärätä usun an angang weires fän itemi pwal fän iten ekewe souläng lon Laotisea me Hierapolis.
14Lukas nöüch we sousafei mi achengicheng pwal Temas ra tinala ar kapong ngenikemi.
15Oupwe uwei äm kapong ngeni pwiich kewe lon Laotisea, pwal ngeni Nimfa me chon ewe mwichefel mi chufengen lon imwan.
16Iwe, mürin ämi wes me aleani ei toropwe, oupwe pii pwe epwe pwal alea ngeni chon ewe mwichefel lon Laotisea. Nge pwal ämi oupwe aleani ewe toropwe pwiich kewe lon Laotisea repwe tinala remi.
17Oupwe üreni Arkipus, “Kopwe föri ewe angang ra awisa ngonuk lon än ewe Samol we angang pwe kopwe apwönüetä.”
18Ei kapong ngang Paulus üa makkei ren püsin pei. Oupwe chechemeni pwe üa nom lon imwen fötek! Än Kot ümöümöch epwe nonom remi meinisin.
