1Nyakama kamongo dupame nyakamanya kendemane dupa-kisa mana tolao minao kapa pena lao pyepape. Nyakama kamongo dupanya Kamongo mende kaiti-kisa kalyamoakana lao masalapape.
2Nyakamame lomaka soo isetae katao Gote lao tama pyoo kalyepape.
3Dopa pitamino gii dokopa Goteme naima apata dapa pyoo nisina lao loma salapapeaka: Goteme Kataisa-kisa pitona lao yalo pyoo masoo kateamo doko lao panasoo naimame baanya Wai Pii Epe doko lamaiyakalapale lao baame naimanya kaitini mende lumbekena lao loma salapape. Kalai dokonyaka namba anjetae kateo doko mee kalyo.
4Kini, nambame pii doko auu pyoo lao panao namba-kisa kalai silyamoli pyoo pyaale lao loma salapape.
5Sosanya konda napingi endakali dupanya kaina dokonya nyakama auu pyoo masoo payao, kalai pipenge jetamo doko pyokondape pyoo pyepape.
6Koteaka lao nyakamame pii latamino dupa tenge paliuu tende pina lao laapape. Endakali mendai mendai lao dupanya pii auu pyoo yanu pyakamaipenge dupa mana nyoo kalyepape.
7Namba dopa pyoo kalyeno lao nambanya pii dupa pitaka akali Tikikasa dokome nyakama langita. Tikikasa doko naimanya auu kaenge kaiminingi, Kamongonya kalai akali tupi lapae. Baa naima-pipa Kamongonya kendemane kalai mendai pyakamaingi.
8Nyakamame naima dopa pyoo kalyaminona lao masalapale lao tenge mendai dokonya baame nyakama langyoo nyakamanya mona kyoto injisakao nambame baa epena lelyo.
9Nambame nyakamanya akali Onisimasa naimanya auu kaenge kaiminingi akali tupi lapae doko Tikikasapa awapa epena lelyo. Akali dolapome kapa pao ae pilyamo dupa pitaka nyakama langitambi.
10Namba-pipa awapa anjetae palenge akali Atitakasame nyakama kandao auu pyoo kalyepape lelyamo. Dee Banapasanya kaiingi Makeme nyakama auu pyoo kalyepape lelyamo. Nyakamame baa kandao dopa pyepape lapae pii mende nyepeami. Baa nyakama katatamisa epea kandeno doko, nyakamame baa lanyalapape.
11Akali mende kenge Jisasa Jasatasa lenge dokome apata nyakama auu pyoo kalyepape lelyamoaka. Juta dupanya Kitisene akali tepoma datupame iki Gotenya isingi dokonya namba-pipa awapa kalai pyoo kalyamino. Akali datupame nambanya mona doko minao auu pisekeami.
12Nyakamanya akali Ipapotasa dokome nyakama auu pyoo kalyepape lelyamo. Baa Kataisa Jisasanya kendemane akali. Goteme nyakama akali angi injisina lao, baame pipimili lao masingi doko pitaka etete masokondape pyoo masoo kalyepale lao, Ipapotasame koteaka lao nyakama nisoo kyoto joo loma soo katenge.
13Baame nyakamapi Leotosia kalyamino dupapi Itapolisa kalyamino dupapi nisalanya lekeleke tao kalai pilyamona lelyo.
14Naimanya auu kaenge dokosaa Lukupa dee akali Dimasapame nyakama auu pyoo kalyepape lelyambino.
15Nyakamame Leotosia kalyamino masoo miningi kaiminingi dupapi enda Nipapi dee endakali baanya andaka kambu pingi sosa dokopi dupa kandao nambame auu pyoo katena lelyona lamaiyakalapape.
16Nyakama pepa dake itaki pyao langitatamino dokopa nyakamame sepala Leotosia yuu dokonya sosa kalyamo dokome apata sina pyasalapape. Dee nyakamame Leotosia kalyamino dupanya pepa doko apata nyoo itaki pyao kanjepapeaka.
17Dee nyakamame akali Akipasa doko dapa lamaiyepape: “Kamongo dokome embame kalai pyakatale lao diamo dupa kandao isoo katao dupa pitaka pyakamaipi,” lao lamaiyepape.
18Nyakama auu pyoo kalyepape lelyo pii dake namba tangenya kingimi pyekelyo: namba Polo. Namba anjetae palelyo doko nyakamame kame sala nayalapape. Goteme nyakamanya mona epe palyekena!
