ቆላሲያሴ ዓሶም 4

1

2

3

4

¹ዒንሢ ዓይሎ'' ዎይሣ ዓሳ! ዒንሢያ ጫሪንጮይዳ ዒንሢኮ ጎዳ ዓኣሢ ዔራያታሢሮ ዒንሢኮ ዓይሎ'' ፒዜ ማዔ ጎይሢና ሄኮ ዛጊ ዎይሡዋቴ።

²ፆኦሲ ጋላቲሢና ሓሹ''ዋዖ ቢያ ዎዴ ዶዲ ሺኢቁዋቴ፤

³ፆኦሲ ፔኤኮ ኮዦ ሃይሶ ኑ ኬኤዛንዳ ካራ ኑም ቡላ''ንዳጉዲና ዒዛ ዛሎ'' ታ ቱኡቴ፥ ኪሪስቶሴኮ ዓኣሺንቴ ኮዦ ሃይሶ ኑ ኬኤዛንዳጉዲ ኑማኣ ሺኢቁዋቴ።

⁴ሃሣ ታኣኒያ ኮይሳሢጉዲ ፔጋሲ ፆኦሲ ቃኣሎ'' ዓሶም ኬኤዛንዳጉዲ ታኣም ሺኢቁዋቴ።

⁵ዓይጎ ካራና ማዔቴያ ዒንሢ ዴንቄማና ዔሪ ማዺ ማዺ፥ ኪሪስቶሴ ጉሙርቁዋ ዓሶ ባኣካ'' ዔራቶና ናንጉዋቴ።

⁶ዒንሢኮ ጌኤዛ ቢያ ዎዴና ዓሲም ዋይዛኒ ናሻያ ሃሣ ኮሺ ማዖንጎ፤ ሃሣ ዒንሢ፡ ዓሶም ፒዜና ማሂ ኬኤዞንዶ ባኮዋ ዔራንዳያ ኮይሳኔ።

⁷ቲኪቆሴ ታ ዛሎ'' ዓኣ ባኮ ቢያ ዒንሢም ኬኤዛንዳኔ፤ ዒዚ ናሽኪንታያ ሃሣ ጉሙርቂንቲ ማዻያ ማዔ፥ ታኣና ዎላ'' ጎዳ ማዾ'' ማዻ ታ ዒሻሢኬ።

⁸ዒዛ ታ ዒንሢ ኮይላ'' ዳካሢ ኑ ዛሎ'' ዒንሢም ኬኤዛንዳጉዲና ዒኖ ዒንሢኮ ዶዲሻንዳጉዲኬ።

⁹ዒዛና ዎላ'' ዒንሢኮ ፃጳሢ ማዔ፥ ጉሙርቂንታያና ናሽኪንታ ዒሻሢ፥ ዓናሲሞሴያ ዒንሢ ኮይላ'' ሙካንዳኔ፤ ዔያታ ሃይካ ዓኣ ባኮ ቢያ ዒንሢም ኬኤዛንዳኔ።

¹⁰ታኣና ዎላ'' ቱኡቴ ዓሪስፂሮኮሴንታ ዒንሢ ኮይላ'' ሙኬቴ ዒንሢ ዒዛ ሾኦቺንሢ ዔካንዳጉዲ ታ ዒንሢም ቤርታ ኬኤዜ፥ ባርናባሴኮ ዔኤዚሜ፥ ማርቆሴያ ዒንሢ «ኮሺዳ?» ጌዔኔ።

¹¹ዒዮስፆሴ ጌይንታ ዒያሱዋ «ኮሺዳ?» ዒንሢ ጋዓኔ። ፆኦሲ ካኣቱሞ ማዾ'' ታኣና ዎላ'' ማዻ ዓሶ ባኣካ''ፓ ዓይሁዴ ማዔ ዓሶንሢ ዬንሢ ሌሊኬ፤ ዔያታ ታና ዶዲሼኔ።

¹²ዬሱስ ኪሪስቶሴም ማዻያ ማዔ፥ ዒንሢ ፃጳሢ ዔጳፒራ «ኮሺዳ?» ዒንሢ ጋዓኔ። ፆኦሲ ማሊፆጉዴያ ሂርጋ ባኣያ ማዒ፤ ሃሣ ዓያና ናንጊናኣ ዲጪ፥ ዶዲ ዒንሢ ዔቃንዳጉዲ ቢያ ዎዴ ዒንሢ ዛሎ'' ዒ ዶዲ ሺኢቃኔ።

¹³ዒንሢ፥ ሎዶቂያይዳ ዓኣ ዓሶና ሂራፖሊዮሴይዳ ዓኣ ዓሶ ዛሎ'' ሚርጌና ዒ ላቢ'' ማዻሢኮ ታ ማርካኬ።

¹⁴ዼኤሾ ዔራ፥ ናሽኪንታ ሉቃሴንታ ዴማሴንታ «ኮሺዳ?» ዒንሢ ጋዓኔ።

¹⁵ሎዶቂያይዳ ዓኣ ዒሾንሢታ ሚሾንሢንታ፥ ኒምፑንታ ሃሣ ዒዞ ማኣሮይዳ ቡኪንታ ኪሪስቶሴ ጉሙርቃ ዓሶንታም «ኮሺዳ?» ጋዓኔ፥ ጎውዋቴ።

¹⁶ሓኖ' ኪኢቴሎ ዒንሢ ናባቤሢኮ ጊንፃ ሎዶቂያይዳ ዓኣ ሺኢጲፆ ማኣሮ ዓሶማኣ ናባቢሱዋቴ፤ ዒንሢያ ታኣኒ ሎዶቂያ ዓሶም ዳኬ ኪኢታ'' ዒንሢ ሄላ''ኣና ናባቡዋቴ።

¹⁷ዓርኪፖሴም፦ «ጎዳይዳፓ ኔኤም ዒንጊንቴ ማዾ'' ዶዲ፥ ጋፒንፆ ሄሊ''ሲ ማዼ» ጋዓኔ፥ ጌይ ኬኤዙዋቴ።

¹⁸ሃይማ ጋፒንፆ ማሊፆማ ታኣኒ ጳውሎሴ ታ ኩቻ ፃኣፔኔ። ታ ሓሢ ሄላ''ዖ ቱኡዞ ማኣራ ዓኣሢ ዔሩዋቴ። ፆኦሲኮ ኮሹሞ ዒንጊፃ ዒንሢም ማዖንጎ።