Juan 12

1

2

3

4

5

6

7

8

9

10

11

12

13

14

15

16

17

18

19

20

21

¹ja Pascua nawai besi ana 6 día ma ika kemaibun Jerusalén dapi Betania anu nukube Jesús ka Jesúsun Lázaro bestenwainma ana jiweawen taexun

²jawen shinan chankankin jabun Jesús duawakin badi kaya piti midima nuku bawaxunabu tapu chanpa anu Lázaro inun jawen jaibuaibu Jesúsbe daka baxti ixun piaibun Martan piti betsa betsapa bebidan bebidanaya

³januxun Marían xeni jene ininipa jawen xankama 300 gramo kesua jawen kena nardo jas kadujaida bexun Jesúsun taeki jukakin tae peuka dasibi jiwe napua iki inin shiamayaya jawen bu chaipawen tede akaya

⁴nun jawen tsuma betsa Judas Iscarioten chipu Jesús jatu achimaxanaitun yuikin:

⁵—¿Jaskakin jatu inantan 300 xaba daya peiti biamamen? Ja peiwen nuitapaibu medabewati shadabin!— ibiai

⁶ja nuitapaibuwen nuiamadi jakia jatun nukun pei nukun kapankanki nun mekemabia eskadabe bi yumetsubiakunkaini

⁷Judasin jaska yuiai ninkatan Jesúsun yuikin: —Ana jadi yuiyamawe, na eki tanaxun aduimaxun en mawa chaputima wakin bebunkidi duawakin ea puxaxukidan.

⁸Nuitapaibu matube jiweabu man jatu duawapaketiduki. Jakia eadan, jawenchains man ea duawapaketidumaki— nuku wa

⁹janua Jesús Betania anu jua judio xanen ibubun ninkatan Jesús besti uinun ikama Lázaro bestenwainmadi jabe uinun ika beabun

¹⁰jakia Lázaro ana bestenwainmawen taexun xanen ibu ichapabun jatu jenebain Jesúsun jancha ninkakin ikunwanun ika paxkabainaibuwen taea datei Diosbe nukunabu janchaxunika xanen ibubu yubakai: —Lázaro dikabi tenantiki— ika yubakanibukiaki.

¹²Jesús uxashini bestenkaini Jerusalénki kemai juai banabitan Pascuatian nawai besi beshian yudabu midimabun Jesús kenwanbainkin xenpan pei mextexun sanan sanan axunkubainkin jancha kushipawen yuibainkin: —Dios nukuwen nuikin nuku medabewamiski. Diosun kushipaya juai kenwanankanwen, nun Israelbun Xanen Ibu kayabikidan— iki jaki nukui buaibun

¹⁴januxun Diosun jancha yuixunikan yuikin: “Jerusalén anuabuun, matun xanen ibu jawa keanma burro bake kamaki katsaumea juxanikiki. Dateama uinxankanwen”, jatu watan kenenidan, jabiaskadiai burro bake Jesúsun bechitan jaki katsaumekaini kai Jerusalén jikiaya

¹⁶januxun ja dukun Jesús jaskai nun jawen tsumabun nun jawa ninkakin pewama iniki. Jakia chipu Diosun Jesús bestenwainmaken shinankin jaska dasibi ikima ja kenenibu inun kenwankubidanshinabu shinankin atimas jakidi nun ninkaniki.

¹⁷Jabiatiandi Lázaro mawashina Jesúsun kenakin bestenwain uinmabun yudan kaian jabu jatuki chanikin jatu yuibaunbaunaibun

¹⁸jawen jatu unanmati dami wakin bestenwanshiankidi ninkatan Jesúski nukutani beaibun

¹⁹fariseobun jabun ikunwanma uin yuinamei: —Uinkanwen, nun jawawen ana jatu bepadanxun itimakidan. Dasibibun ikunwanbaini jaki dasikanikikidan— ikaibun

²⁰judiobubetan nawabu xuku betsa griegobun Dios kenwain jatube besi nawai Jerusalén anu beshianbu

²¹Felipen mae Betsaida Galilea mai pakea anua griegonawabu jaki nukuxun yukakin: —Xanen ibuun, nun Jesúsbe janchakatsis ikaii— akabu

²²jatu bashiyubaini kaxun Andrés yuitan ja dabe kaxun jaskaibu Jesús yuiabu

²³Jesús juxun jatu yuikin: —Matun Juchi Kayabi Iyua Diosun jatu ea kenwanmakatsis ikaidan, ma kemaikiki, ikisdan.

²⁴Chanima en matu yuiaii. Jexe mai medan banama jawa bimitidumaki. Jakia mai uke medan bana jawen nami chapui dami jukuin yumetan bimijaidamiski. Eadan, en jaska keskayuaii.

²⁵Jamen tsuabunda jawen jiwea ibubis bechipai yaushidan, ibubis benuxankanikiki. Jakia tsuabuda jawen jiwea jawa yaushi nuiama ekidi ma shinan pewa ana jiwekuinxankanikiki, ikibi ikidan.

²⁶Tsuabunda ea duawakatsi ikinan, jau ea chibankubainunbunwen. Januxun ea chibankin ea duawaibudan, ebe jiwediaxankanikiki. Jaskawen taexun tsuabuda en Epa Diosun jatu duawaya janu en jiwexanai anu ebe idiaxankanikiki, jabun ea duawamisbudan— iwanan,

²⁷jaskai nun ninkaya Jesúsun jawen Epa yuikin: —Ikis jawenchains juinti metexekei en punu nishmajaidaii. ¿Jawa yuipa?— itan —Epaan, na en yuda jatu mepamatan en paxanun ea nichinwen, akin en mia yuitidubia jakia jabiaskatanun ika en juai min ea yubaniki— atan

²⁸ana yuikin: —Epaan, ewen taexun dasibibun jau mia kenwanxanunbunwen— akaya janua nai anua Diosun jui taxniaiwen yuikin: —En shinanwen min ma abiakubainaya ana jabiaskadi wakin en kena ana kushipa wakin miwen en ana jatu kenwanmakatsis ikaii— akaya

²⁹yudabu mapubaunxun ninkatan yuinamei: —Tin ikainkainimenkain— ikaibun jatiditun yuidiakin: —Diosun nai tsuma janchaimenkain— ikaibun

³⁰jaskaibu ninkatan Jesúsun jatu yuikin: —Na jui taxniai man ninkaxudan, ea medabewanun ika jancha taxniamaki. Jakia matu medabewanun ika jancha taxnixuki.

³¹Na jabiatian yudabu unanti wakin diablo Satanás yudabu dasibibuwen xanen ibumis mebintan en udenxanaii.

³²Mai anuxun ea binikin sanankin nichinmabun jaskawen taexun dasibibu ninia keska wakin ea anu en jatu iwexanaii, jau ichapabun ea ikunwanunbunan— iwanan,

³³jaskai cruzkia mawaxanai jatube nukuki chanikin unanmaya

³⁴januxun mapubaunabu betsan yuikin: —Diosun jancha kenenibu anua uinkin nun manakamisdan, “Mesías Cristo jua matube jiwepakexanikiki”, akin kenenibukenan jaskakin: “Nukun Juchi Kayabi Iyua Mesías binikin sanankin nichinxankanikiki”, ikin ¿min jaska nuku yuixumen? ¿Jaskakenan, tsuamen, nukun Juchi Kayabi Iyuadan?— aka

³⁵Jesúsun ana jatu yuikin: —Ana uxa eskadabesi Dioskidi unanmanika xaba keskadan, matube jiweyuikiki. Jaskayuaya na jancha ninkai jiweyukanwen. Jamen bin nukawa keskai ma en kaken tsuabunda unandiabuma meshun achia keskai janida baiwen kai bai unanma man mextantidubumaki. Unaindakanwen.

³⁶Ja xaba man ebe ketaxamekatsis ikidan, man xaba jayayuaki. Ja xaba man jaya ninkatan ea ikunwankanwen— jatu watan junetan nukube kainkainiki.

³⁷Januxun jawen unanmati dami atimaska Jesúsun jatu uinmakin axunbiakubaina jawa ikunwanma inibuki.

³⁸Jaska wanunbadiaibukidi Diosun jancha yuixunika Isaíasin yuikin: “Yavé Diosuun, yudabu min kushipa min jatu uinmakubainmiski. Jakia nukun jancha tsuan ikunwanbumaki”, aniki.

³⁹Jaska inun, Isaíasin yuikin: “Jau uin pewayamanunbun inun jau shinan pewayamanunbun Diosun jatun bedu bekun keska wakin jatun juinti kushi waikiki. Jaskawen taexun Diosun yuikin: ‘Jatun shinan betsa watan ea ikunwainbu en jatu xuxawakeanaii’ ”, akin Diosun jancha ikunwantidubumakidi Isaíasin keneniki.

⁴¹Januxun Isaíasin namai keskakin Jesúsun kushipa uintan jakidi chanikin jatu kenexuniki.

⁴²Isaíasin jaska keneniken judio xanen ibu ichapabun Jesús ikunwainbun inun xanen ibujaida binuabu jatidibundi ikunwanbiai: “Jau nukun ichati anua taxnimakin nuku nichinyamaxanunbun”, ika fariseobuki datekin yuda ichapabun Jesús ikunwainkidi xabakabi yuiama iyunibukiaki,

⁴³Jesús shinanbiakin jawenabu kenwanmayukatsis ikin Dioskidi bexmas kenwankin dateyabi shinankinan.

⁴⁴Januxun jancha kushipawen Jesúsun nuku yuikin: —Tsuabunda ea ikunwankin ea besti ikunwanma jakia en Epa jatun ea yununidi ikunwankanikiki.

⁴⁵Jabiaskadi wakin ea uinkin jatun ea yununidi unandiakanikiki.

⁴⁶Yudabu mai anua jatu ikunwanmatanun ika xaba keska en juniwen taea tsuabunda ea ikunwain meshu medan jadi jiweama keska ixankanikiki.

⁴⁷Jakia yudabu kupinun ika juama jatu medabewanun ika en juniwen taexun en jancha ninkabiakin tsuabunda chibanmaken ikis en jatu kupiamaki.

⁴⁸Jakia en jancha danankin bechipaiabuma jabuna kupiti ma jayaki. Xaba jawen jenea unantitian en janchawen taexun Diosun jabu jatu kupixanikiki.

⁴⁹Eanan, en shinanen en matu yusianmaki. Jakia Epa Diosun ea yununitun ea yunua yusinkin en matu yuimiski.

⁵⁰Ean en Epan jancha en unainan, jadan jiwea keyutima jayaki. Jaskawen taexun en matu yuiaii, jaska en Epan ea yunukin yuinidan— akin nuku xabakabi yuiniki.