Josue 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ne migkaǥi is Nengazen diyà te ki Josue te,

²“Kegiyi nu is menge Israilihanen he mebpilì dan te menge inged he eputà sumalà is migkaǥi ku keniyu zengan pinaaǥi ki Moises.

³Is etew he ebpekepatey he wazè din tivevaa, ne ebpekaaput dutun ne kenà sikandin egkekeizan te menge etew he egkesuat he ebales kandin.

⁴Ebpekaaput sikandin diyà te minsan hendei zutun he menge inged, ne ed-etuvangen din diyà te pultahan te inged is ebpemendumala ne egkeǥiyen din kandan is nehitavù. Ne ibpeseled dan sikandin ne ebeǥayan dan te lugar he egkeubpaan din.

⁵Ne emun ebpekeuma zutun te inged is edal-as kandin he egkesuat he ebales kandin, kinahanglan he kenà sikandin iveǥey te menge meǥinged dutun su wazè din tivevaa is kegkepetaya zin te zuma zin, wey kenà daan heini tenged te kegkepauk din.

⁶Ne kenà sikandin med-awà dutun te inged taman te egkehusey haazà he rirù diyà te etuvangan te kezekelan wey taman te ebpatey is lavew he memumuhat he iyan ebpenilbi zutun he timpu. Ne emun egkehitavù en heini ne egkehimu en ke ed-ulì sikandin diyà te kandan.”

⁷Umbe, mibpilì dan is Kedesh diyà te Galilea he ziyà te vuvungan te Naftali wey is Shekem diyà te vuvungan te Efraim, wey is Kiriat Arba (he iyan is Hebron), he ziyà te vuvungan te Juda.

⁸Diyà te edsilaan te Wahig he Jordan he uvey te Jerico, mibpilì dan is Bezer ziyà te sibsivayan he ziyà te menge suǥud he nesakup te tanà te tribu ni Reuben, is Ramot diyà te Gilead he nesakup te tanà te tribu ni Gad, wey is Golan diyà te Bashan he nesakup te tanà te tribu ni Manase.

⁹Iyan heini menge inged he eputà he mibpilì para te menge Israilihanen wey kenà menge Israilihanen he zuma zan he meǥinged. Is minsan hentei he ebpekepatey he wazè din tivevaa ebpekaaput dutun para kenà sikandin mepatey te menge egkesuat he ebales kandin te wazè pa mehusey haazà is rirù diyà te etuvangan te kezekelan.