1Ne zutun meeles he midsuǥù ni Josue is dezuwa he etew puun te kampu te menge Israilihanen diyà te Shitim su para mekepeniid diyà te Canaan, lavew en te inged he Jerico. Ne hein nekeuma ziyà te Jerico haazà is dezuwa he meniniid, ne ziyè dan medateng te valey ni Rahab; heini he vahi ebelegyà te zengeg din.
2Ne netudtulan is hadì diyà te Jerico, he zutun he kezukileman duen nekeuma he menge Israilihanen te kebpeniid kandan.
3Umbe, impekeǥiyan duen te hadì si Rahab te, “Ipeǥawas nu is menge etew he midateng diyà te valey nu su iyan inhengkayi zan is kebpeniid kayi te inged tew.”
4Migkaǥi si Rahab te, “Tutuu he zuen menge etew he nekehengkayi piru wazè ku metueni ke hendei zan ebpuun. Migenat dan hein merusirem en, he timpu en te kedlekeb duen te pultahan te inged. Ne wazè ku metueni ke hendei zan mebpevayà, iyan, emun egaangaan kew kela ke egkesaut niw pa sikandan.” (Piru iyan tutuu is in-eles ni Rahab haazà is dezuwa he meniniid diyà te atep te valey zin, ne midtembunan din sikandan te menge mibpenamped he menge pinemula he flax he ingkagkag din dutun.)
7Ne midtelukunan diyà te ǥawas duen te menge midsuǥù te hadì sikan is dezuwa he meniniid. Kegawas dan duen te pultahan ne midlekevan dan heini. Ne nekeuma zan diyà te repasan diyà te Wahig he Jordan.
8Ne hein wazè pa medhizeǥà haazà is dezuwa he meniniid, nemenahik si Rahab diyà te atep
9ne migkeǥiyan din sikandan te, “Netuenan ku he imbeǥey keniyu te Nengazen heini he tanà ne utew kew ingkahandek te menge etew kayi.
10Nezineg dey ke mibmenumenu te ebpemaza te Nengazen is Daǥat he Meriǥà dutun te kegawas niw puun te Ehipto. Nezineg dey zaan ke mibmenumenu niw is kebpurung kedezaat duen te zezuwa he hadì te menge Amorihanen he midhadì diyà dapit te edsilaan te Jordan he iyan si Sihon wey si Og.
11Nengahandek key hein nezineg dey haazà ne naawà is kevurut te kada sevaha kenami tenged keniyu. Su is Nengazen he Megbevayè niw iyan Megbevayà diyà te langit wey zini te tanà.
12Umbe, penangdù kew pinaaǥi te ngazan te Nengazen, he edtevangan niw is pemilya ku iring te kedtevangi ku keniyu. Beǥayi a keniyu te gerentiya
13he kena a keniyu edhimetayan wey is amey ku, iney ku, menge suled ku, wey is langun he pemilya zan.”
14Ne migkaǥi haazà is dezuwa he meniniid diyà te ki Rahab te, “Iyan igerentiya zey is untung dey! Basta kenè nu idtug-an is kebpeniid dey kayi, kenè dey sikew ebmenuwen emun ibeǥey en te Nengazen kenami heini he tanà.”
15Is baley ni Rahab nekezegkit duen te elavat he verengbeng duen te inged, umbe midtevangan din sikan is dezuwa he meniniid wey zan mekepenaug he ebayà diyà te sulawà pinaaǥi te kegamit te pisì.
16Migkaǥi si Rahab diyà te kandan te, “Hendiyè kew te menge vuvungan su para kenè kew maahà te ebpen-ahà keniyu. Eles kew ziyà taman te tetelu he andew para ebpekelikù en sikandan kayi. Ne kegkeipus dutun, ne egkehimu en ke edlaus kew ed-ulì.”
17Ne migkaǥi haazà is dezuwa he meniniid diyà te ki Rahab te, “Edtumanen dey is impepenangdù nu kenami.
18Piru kinahanglan he ebeelan nu zaan heini: Emun edsurung key en kayi te tanè niw, ihiket nu heini is meriǥà he pisì diyà te sulawà he mibpeveyaan nu kenami wey key mekepenaug. Ne tiǥuma nu kayi te valey nu is amey nu, iney nu, menge suled nu, wey is langun he pemilya zan.
19Ne emun duen sevaha keniyu he egawas su edhendiyà te zalan, ne wazè dey en televaken emun egkepatey sikandin. Piru zuen dey televaken emun duen egkepatey ziyà te seled te valey nu.
20Piru emun idtug-an nu heini is kebpeniid dey, ne wazè dey en televaken duen te impepenangduan nu kenami.”
21Ne midtavak si Rahab te, “Uya, egketuman is migkaǥi niw.” Ne zutun impeǥenat din sikandan, ne inhiket din sikan is meriǥà he pisì diyà te sulawà.
22Ne hein nekeǥenat en haazà is dezuwa he meniniid, ne midhendiyè dan te menge vuvungan. Ne zutun sikandan med-eles seled te tetelu he andew, ne zutun mibpen-ahà sikandan duen te menge sinuǥù te hadì diyà te menge zalan. Ne wazà sikandan meturedu, umbe nemen-ulì dà tekew haazà is menge sinuǥù te hadì.
23Ne midtupang haazà is dezuwa he meniniid wey midlayun duen te wahig ne midlikù dan diyà te ki Josue. Ne midtudtul zan ki Josue is langun he neulaula kandan.
24Migkaǥi sikandan te, “Tutuu iyan he imbeǥey kenitew te Nengazen is tivuuk he tanà. Is langun he etew zutun ne nengahandek kenitew.”
