Jon 1:7-17

⁷Jon agai te ula po te we bidibolo pusagasai. Te we bidi tigidali augwaligo te po odoyu, augwa homu tigidali te poba konealumainu eyu, te Jongo te po pusagasai.

⁸Jon aga digi te ula menio. Tiali goli agai te ula po augwalibolo te po wagasai.

⁹Te ula da te ula mu dao. Tama aga te sogo tǫba dulai, tigidali we bidi ula mawainogo yali.

¹⁰Te Po e tǫde bidai. Aga digi e tǫ nigai. Tiali goli tǫde bidibo we bidi augwaligo aga konebeo.

¹¹Aga bulu muba asai. Tiali goli aga hani augwaligo aga sabeo, gesebeo.

¹²Tialima, aga augwali bidi dabe mego sali, gesalio. Augwaligo augwa homu agaba muani. Tama tibaso, agai augwalide usu da po olama, tama augwali Godigo wai puluba pedalai dao.

¹³Tama augwali Godigo wai puluba gagawainogo, augwali augwa ida ayago kanemego ame nabeo. Te augwali Godigo wai te augwa tigigo homugo me ame nabe. Bidigo homugo menio. God aga digi augwali aga wai puluba pedalali dao.

¹⁴Te Po aga digi bidi pedalai, tama da we bidi tomode aga bidai. Dago agai genuai nogi dali agai moni bomo dali si suai. Te Godigo Ogwa deligo genuai nogi dali bomo dali si dago suai. Agai te we bidi olo tau sabo sę hauwa eyu, te agai mu po naga weyu yai.

¹⁵Te we bidi baptais mabo bidi Jon agai te we bidibolo agai po weyu i tama wai, “Polobadu eno te po wai, ‘Nosali bidi me asobo bidi agai eno nogi aiyaba elaluaibao. Magi basowe? Ena ame nesiąbadi, aga polobadu mu bidai. Tama tibaso, agai nogigo eno nogi aiyaba elalubo dao,’ eno te po wai. Tama megi te bidi e dao, eno dagebolo polobadu wali po gilama,” Jongo te po wai.

¹⁶Aga te olo tau sabo sę hauwa mu ebo dao. Tama dabolo agai ma eyu, ma eyu idu gebo dao.

¹⁷Te bidi nogi Moses agai da Juda dabego wąį mu augwalibolo agai Godigo bomo yai po ola mawai. Tiali goli, Jisas Krais agai genuai olo tau sabo sę dali mu po dali si magasai.