Joun 1:7-17

⁷Joun kako oso pomponaho hisoꞌne aꞌamu hopiꞌnonohino somo ujoꞌne pmmentiso hweho. Aꞌamu hopiꞌnonohinoso oso hungkuno homo somo upaꞌnɨngkuji sɨmeho hiꞌntnnono uyɨfitnneꞌento pmmentisofoho.

⁸Joun huhwo sohwo kako pomponaho hwoꞌmaho. Oꞌo, Anɨtu kako oso pomponaho hisoꞌno aꞌamu somo utɨhwayoꞌne Jounɨmo uhwatɨmentisofoho.

⁹Pomponaho ne hiso kako aꞌamu hopiꞌnonohino hnꞌnɨmo honɨngkano netɨhwayoꞌne lonasiyoꞌnefoho. Oseso Joun kako nohumentanɨngki oso pomponaho ne sohwo imoꞌnonto kako aꞌamumo honɨngkano wopɨngo utɨhwayo hweho.

¹⁰Anɨtu kakoe hungkuno sohwoꞌnji olo hwaho loso mtɨꞌmokumentiso sohwo olopo nopahonɨngki aꞌamu olo hwaho loponjoso kakimo yofe muhwoꞌmmentohofofoho. Oꞌo, muhwosoꞌnjo yontɨfi monje yahumentohofofoho.

¹¹Kako kakoe hwapɨngopo iꞌmofɨwahonɨngki kakoe temtitofo aꞌamu Jutaso hofɨko kakimo sɨmeho muyoꞌnjo yontɨfi hwotoho hmmentohofofoho.

¹²I osoꞌno aꞌamu fehohnjo sohwa hofɨko Kɨlaisɨmo yofe uhwofontɨfi kakoe hungkunomo sɨmeho hiꞌntnnono uyɨmentohofofoho. I aꞌamu hopiꞌnonohinoso hofɨko Kɨlaisɨmo sɨmeho unyo somo Kɨlais kako kakoe yokumpohnꞌnyo uyɨmentiso soꞌno Anɨtuye aꞌamu ne umokumentisofoho.

¹³Moyaꞌmi sofa hofɨko mehomi aswo mawoꞌnɨngkohofo hopaso aꞌamu Anɨtuye mehomi mmoꞌnɨfitnnehofo. Oꞌo, aꞌamufe yokumpohnꞌnyo mtaꞌni u, aꞌamufe huno mtaꞌni aꞌamu Anɨtuye mehomi ne imoꞌnyoso mmoꞌnɨfitnnefoho. Oꞌo, Anɨtu kako huno ole syafɨhuꞌmento, Aꞌamuso nje hwomumo sɨmeho uyɨkujoꞌmanji hofɨko nje mehomi ne imoꞌnɨfitnnefoho. Ose syafɨhuꞌmentisofoho.

¹⁴Anɨtuye hungkuno hweho lɨwoꞌnɨngkuhwone sohwo kako aꞌamu imoꞌnonto Kɨlais huhwo sohwo nakwoꞌnjo ajwo lopo humamentisofoho. Nohumanto kako aꞌamu hnꞌnɨmo wopɨngoꞌnohini nalohofonto kako hungkuno neꞌnjoꞌnohini lonetɨhwamentiso hweho. Nakwo aꞌamu fehohnjo hnꞌnwi nakwo Kɨlaisɨye yokumpohnꞌnyo engo somo uhwonontani kakoe yofe engo uhwoꞌmentɨhwonefoho. Oso yofe engoso yokumpohnꞌnyo engoso Anɨtu kakoe Hwomumo uyahonɨngki uhwonontani Anɨtuye Hwomu angaꞌnohino hweho uhwoꞌmentɨhwonefoho.

¹⁵Joun kako iꞌmofaponto Kɨlais huhwo sohumneꞌno lɨjwaoꞌmentisofoho. Ole lɨjwaoꞌmento, Olo hwe lohumneꞌno ole nto selɨmentohefoho. Ngko sɨmoꞌmo sekumo nto seꞌmaꞌmentohefoho. Tɨfi hwe nomꞌne sohwo noseꞌmahwosi kako nje yofe engomo woniyakoloꞌmontonoho. Hwapɨngoso ngko nje naꞌu aswo monɨmaso sohonta kako songo humamojo hweho. Kakoe yofe engoso ngkimo noniyakolofonefoho.

¹⁶Kako nakumo wopɨngo nalohofoso hwapɨngo hweho. Osoꞌno nakwo wonyoꞌnohino ko hnꞌnɨmo kakoe wopɨngoꞌnohinoso nakumo wopɨngo neꞌno neꞌno nalohofɨwoꞌnɨngkiso hweho.

¹⁷Hohonta Anɨtu kako neyakwo Mousesɨmo kakoe honɨngkano hungkuno uyɨmentisofoho. Oso honɨngkano hungkuno homo somo aꞌamu ntoꞌno minɨngkammentohofoso hofɨko tohino engo tɨpemaꞌmentohofofoho. I osoꞌno olohonta Jisas Kɨlais kako noneꞌmahonɨngki kako honɨngkano neso nonetɨhwanto kako nakwoe wonyo somjo tohino nomanto kako wopɨngoꞌnohini nalohofɨwoꞌnɨngkiso hweho.