Dyan 1:7-17

⁷Én duen Dwata mdek ku Dyan du fye tmulen di dad to gablà di salò ani, du fye i kdee dad to faglut di kenen.

⁸Na Dyan, ise kenen i salò, bay kenen i tmulen gablà di salò.

⁹Hae, du én i bang kakel i too glut salò tmuyal di kdee dad to dini di tah tanà.

¹⁰Mnê kenen dini di tah tanà mgimò fagu di kenen, bay knean, là dilè i dad to ku simto kenen.

¹¹Na salu kenen di kenen banwe, bay i dad ton là dmawat kenen.

¹²Kabay i dad to dmawat na faglut di kenen, banlén kaglut du fye mbaling ale dad ngà Dwata.

¹³Là ale mbaling dad ngà Dwata fagu di kngà i to di tah tanà, ku demen fagu di knayè i to, ku demen fagu di nimòla, bay Dwata i mimò dale i dad ngaan.

¹⁴I dnagit Tnalù tambaling to, na mnè kenen di safédito na tatoon fite i kafyen di gito, na too glut i kdee manan. Tateenito i bong kdatahan, i kdatah i sen Tingà Maan Dwata.

¹⁵Tulen Dyan gablà di kenen, na falbongan i taluan, manan, “Nun to tmadol deg too mdatah fa di deg, du di là agu fa sut tagnè nun kenen.”

¹⁶Na mdà di bong kafyen, kdeeito banlé kafye, na galan tananù i kafye blén.

¹⁷Hae, du fagu di ku Mosis blé Dwata di gito i dad flaloan, bay blén i kafye na kaglut di gito fagu di ku Dyisas Krayst.