John 1:19-37

¹⁹Digau aamua o Jew i Jerusalem ga hagau nadau gau hai mee dabu, mono gau Levi gi John belee heeu gi mee, “Goe koai?”

²⁰John digi de hiihai di helekai gi nia heeu digaula. Mee ga helekai haga madammaa, “Au hagalee go di Mesaia.”

²¹Digaula ga heeu labelaa, “Malaa, goe koai? Go Elijah?” John ga helekai gi digaula, “Deeai, au hagalee go mee.” Digaula ga heeu, “Goe di Soukohp?” Gei mee ga helekai, “Deeai.”

²²Digaula ga helekai gi mee, “Hagia mai goe koai, gimaadou belee hai gii kae madau helekai gi muli gi digau ala ne hagau mai gimaadou. Malaa goe la ga helekai bolo aha i di goe?”

²³John ga helekai i telekai soukohp Isaiah, “Au go di lee o tangada dela e wolowolo i lodo di anggowaa boloo: Haga huudonu ina di ala o Dimaadua e haele ai!”

²⁴Digau kae hegau aanei la ne hagau mai go nia Pharisee,

²⁵ga heeu gi John, “Maa goe hagalee go di Mesaia, be go Elijah, be go di Soukohp, malaa goe e aha dela e haihai au babdais?”

²⁶John ga helekai, “Au e hai agu babdais gi nia wai. Tangada i golo i godou lodo, goodou e de iloo.

²⁷Mee e hanimoi i ogu muli, gei au hagalee tau loo bolo e wwede nia suudi o Maa.”

²⁸Nia mee huogodoo aanei la ne hai i Bethany i di baahi gi dua di monowai Jordan, di gowaa nogo hai nia babdais a John.

²⁹Di laangi nomuli, gei John gaa mmada gi Jesus e hanimoi, geia ga helekai, “Deenei Tama siibi a God, dela e daa gi daha nia huaidu o digau henuailala.

³⁰Deenei Tangada nogo helehelekai iei au boloo, ‘Tangada dela e hanimoi i ogu muli, le koia e aamua i di au, idimaa, Mee gu i golo i mua dogu haanau.’

³¹Au digi iloo a Mee, gei au ne hanimoi belee hai agu babdais gi nia wai, belee haga modongoohia a Mee gi digau Israel.”

³²Deenei di haga modongoohia a John ne hai, “Au guu mmada gi di Hagataalunga e haneia i di langi gadoo be di mwuroi gi hongo o Mee.

³³Gei au digi modongoohia bolo ma go Mee. Malaa God, dela ne hagau mai au belee hai agu babdais gi nia wai, la ne helekai mai boloo, ‘Goe gaa mmada gi di Hagataalunga ga haneia gi hongo Taane, deelaa go Mee e hai ana babdais gi di Hagataalunga Dabu.’”

³⁴John ga helekai, “Au gu gidee au, au e hagi adu gi goodou, Mee go Tama a God.”

³⁵Di laangi nomuli, John nogo duu labelaa i golo mo ana dama agoago dogolua.

³⁶Di madagoaa hua a mee ne gidee Jesus e haele i golo, gei mee ga helekai, “Deelaa Tama siibi a God.”

³⁷Nia dama agoago dogolua ne longono a mee ne helekai beenei, gaa hula i muli o Jesus.