Dyan 1:19-37

¹⁹Na ani tulen Dyan di bang nun dad ganlal dad Dyu déén di Dyérusalém mdek dademe dad bà di Dwata na dad bel Libay salu di ku Dyan, du smalek ku simto kenen.

²⁰Là buni Dyan i kaglutan, bay toon tulen, manan, “Ise agu i Mgalék Dwata.”

²¹Na snalekla kenen, manla, “Kabay, simto ge? Ge kè Ilaydya?” Manan, “Ise.” Na snalekla, manla, “Ge kè i Tugad Dwata fatanmi?” Tmimel kenen, manan, “Ise.”

²²Taman manla, “Na, tulenam gami ku simto ge, du fye nun timelmi di dad to mdek gami. Tan i manam gablà di ktom?”

²³Na tmimel Dyan fagu di dad talù i tugad Dwata Isaya, manan, “Deg sa i to tamlo di banwe landè to mnè déén, manan, ‘Tanluyu i dalan gumagu i Amu.’ ”

²⁴Na i dad to smalek ku Dyan ani dunan dad to dek dad Farisi.

²⁵Na snalekla kenen, “Ku ise ge i Mgalék Dwata ku demen Ilaydya, ku demen i Tugad Dwata fatanmi, na kan ku gal ge munyag?”

²⁶Na man Dyan, “Hae, du munyag agu alò fagu di yéél, bay tanun mdatah fa di deg di blengyu làyu fa dilè.

²⁷Dunan i mangu tmadol deg na du too mdatah kenen là agu gablà balù mbel i ikat talumfaan.”

²⁸Na kdee ani tamgimò di banwe Bétani di faltù i yéél Dyordan déén di gal gumunyag Dyan.

²⁹Di tmadol duh, teen Dyan Dyisas fdadong di kenen, na manan di dad to, “Neyeyu tadini i tingà bilibili Dwata, i dsù mwè i dad salà i dad to di klamang banwe.

³⁰Ani i tatulengu gamu di kmangu, ‘Nun to tmadol deg, too mdatah fa di deg, du di là agu fa sut tagnè nun kenen.’

³¹Na balù deg di muna làgu fa dilè i to tmadol deg, bay munyag agu di yéél du fye fdilègu kenen di dad bel Israél di kakelan.”

³²Na ani man Dyan gablà di kenen, manan, “Teengu i Tulus Dwata fdanà mdà di langit gambet i abun, na mnè di kenen.

³³Di muna làgu kenen dilè, bay Dwata, i mdek deg munyag fagu di yéél, manan di deg, ‘Ku nè to teenam gumdaf na gumnè Tulus Dwata, dunan i to munyag fagu di Mtiu Tulus.’

³⁴Taman du tateengu i gman Dwata di deg tulengu gamu, to ani Tingà Dwata.”

³⁵Di tmadol duh, lêman tadag déén Dyan na lwe gal mlalò kenen,

³⁶na teenan Dyisas mlius di dale, na manan, “Neyeyu tadéén i Tingà Bilibili Dwata!”

³⁷Di kaklinge i lwe gal mlalò ku Dyan i manan, mlalò ale ku Dyisas.