Juan 1:19-37

¹⁹Judiomonae pomonae ena Jerusalén tomaratha barapomonae sacerdotemonae itorobatsi irʉrʉ levitamonae itorobatsi Juan beya, xua Juan peyainyabinexatsi xua pejeinexatsi: “¿Xam jintamʉmda?” pejeinexatsi.

²⁰Juan beta nayabara paeba, jeye: —Xan Mesías apara aibin, pon Nacom itorobicaena, pon wanaca capanenebiwa tsane, jei Juan.

²¹Nexata equeicha Juan yainyabatsi, jeichichi: —¿Metha nexata xam jintamʉmda? ¿Bara xam bapom pon Nacom peitorobi jume pepaebim pon pewʉn Elías, pon bayatha tʉpa? jei barapomonae. Juan jume nota, jeye: —Xan bapon apara aibin, jei. Equeicha Juan yainyabatsi, jeichichi: —¿Nexata jintam metham? ¿Xam bapom pon Nacom peitorobi jume nepaebim pon bewa patopeicaena juinya pata tanecuidubinexa tsane Nacom Pejume Diwesi? jei barapomonae. Equeicha Juan jume nota, jeye: —Jume, xan apara aibin dapon, jei Juan.

²²Nexata daxita barapomonae Juan baraichi, jeye: —¿Eta pom metham? Tsipei xua pata tanejume notsiwam pata tha xuya tsipaebichi pomonae pana nejume caitoroba. ¿Etabe pana nejumichim tsane xua jinya coutha nenayabara paebiwam? jei barapomonae.

²³Nexata Juan jume nota, jeye: —Xan bapon aparan pon wawan ichaxota ira xuepana susato tsurucuae nacua beya, xua jan: ‘Patsi najʉntʉ cui coyene wʉnaere, pon jiwi pia pepa Pecanamataxeinaeinchi nexa pia pepatopae wʉnaeya tsane’, xua jan ponxaein xua wawan ira xuepana susato tsurucuae nacua beya. Bayatha Isaías pejume diwesitha taneyabara jume cui wʉnae tsiwanaya paebixae pon Nacom peitorobi jume pepaebin, jei Juan.

²⁴Daxita pomonae Juan barʉ cueicueijeichi, barapomonae fariseomonae itoroba.

²⁵Daxita barapomonae Juan yainyabatsi, jeichichi: —Icha xam bapon Mesías aibim xuano xua icha Elías aibim, yawa icha xam bapon aibim pon Nacom peitorobi jume nepaebin, ¿nexata jintam cacui itoroba xua nebautisabiwa jiwi? jei barapomonae.

²⁶Juan jume nota, jeye: —Xan meratha bautisaban, ichitha ichʉn beta exanaena beyacaincha xan. Bapon bara bequein painyamonae pia xantha tatsi popona ichitha bapon jopa payaitaem.

²⁷Bequein bapon nepuna patopaena, ichitha pocotsiwa bapon exana bichocono ainya cui beyacaincha pocotsiwa exanan. Bichocono pin ura tsita xeinan xua tataxu mʉ isanaxubiwa tsane pia penataxu xatatsiwa tatsi, jei Juan.

²⁸Daxita baxuan Juan yainyabatsi ichaxota po tomara pewʉn Betania. Barapo tomara eca icha pocotsiwa xometo weecoina xua icha muxunenetha eca Jordán mentha. Barapo muxunenetha Juan bautisaba jiwi.

²⁹Icha mataqueitha Juan tane, Jesús tainchi xua Juan pexainya tarenatsi. Bapoxonae Juan jiwitha jeye: “Incane pataema pon pejʉntʉ coyene xeicaein pon Nacom itorobica, pon ‘Cordero’, baraichichi xua oveja pebto penʉn. Apara bapon pon jiwi petsitʉpaewa tsainchi xua abe pia peexanae cuiru coyenein tatsi icha poxonae ovejiyo ichi poxonae tsitʉpa jiwi abe pia peexanae cuiru coyenein tatsi.

³⁰Bara bapon apara pon bayatha yabara paeban poxonae janje: ‘Pon cotacaya patopa xua xan tsiwʉna patopan, bapon jame bichocono peainya cuin, beyacaincha xan. Tsipei bapon caena bayatha popona poxonae xan aibin xua poxonae abʉ cataunxuae jopa naexanaeinyo’, janje.

³¹Xan copiyatha jopa yaputaeinyo xua Jesús bapon barapara Mesías, pon icha wʉn Cristo, pon Nacom itorobica. Ichitha xan patopan tabautisabinexa meratha Israel piamonae susato saineiwi xua barapomonae bapon peyaputaewa tsainchi”, jei Juan.

³²Juan yawa namchi, jeye: “Poxonae bapon bautisaban bapoxonae tan Nacom pia Pejumope tʉnaxʉ tatsi xua peitaboco weruneica xua be topiboto yaruneica. Barapo Nacom pia Pejumope tʉnaxʉ tatsi, bapon pexantha tapatopatsi.

³³Xan cataunxuae bapoxonae xaniwaicha jopa yaitaeinyo bapon. Ichitha pon xua necui itoroba xua jiwi bautisaban meratha, nejei bapon: ‘Taename tajumope tʉnaxʉ xua be topiboto tsecae xua peitaboco weruneica, po tajumope tʉnaxʉ bapon pia xantha tapatopatsi. Poxonae baxua taename bapoxonae yaputaename xua barapo pebin apara pon jiwi pebautisabiwa tsainchi tajumope tʉnaxʉtha. Bapon barompaya pia pebautisabi coyenewa exanaena xua poxonae barapo tajumope tʉnaxʉ catsibina pomonaetha pomonae piamonaethaxae. Barapoxonae barapo tajumope tʉnaxʉ barapomonae yanaba jinompaeinchi’, jei Nacom.

³⁴Bapoxonae bapon yaitan xua deta cou apara Mesías, yaitama tan xua poxonae bayatha Nacom netsipaeba. Daxota paca tsipaebatsi xua bapon barapara Nacom Pexanto tatsi”, jei Juan jiwitha.

³⁵Icha mataqueitha equeicha Juan pon jiwi Pebautisabin pecoutha patopa xuano xua pebinbe nacueyatabe puna poinchi ponbe xua pia pepuna ponaewichi jiwanabe tatsi.

³⁶Poxonae Juan tane xua Jesús dawerena ichaxoyo Juan dena, bapoxonae Juan jeye xua Jesús yabara jeichi: —¡Pataema apara bapon pon ‘Cordero’ baraichi xua oveja pebto penʉn pon Nacom itorobica xua petsitʉpaenexa jiwi abe pia peexanae cuiru coyenein tatsi! jei Juan.

³⁷Barapo pebinbe ponbe Juan pia pepuna ponaewichi jiwanabe tatsi, baraponbe Juan jume tainchibe xua Juan baxua paeba. Bapoxonae barapo pebinbe Jesús puna poinchibe.