Jon 1:19-37

¹⁹Jon uqana qasali maadec eu odi. Juda agena ilo dana Jerusalemdec age dana leih ihanec danaca Liwaica suladecebil Jonca li sisildu madoin, “Hina in?” doin.

²⁰Odocobil Jon je qee jahunadel qa uqa camasac qasali maaden, “Anutna Krais eu ija qee,” aden.

²¹Odocob age sisildoin, “Odiqa eeta odeia? Hina Ilaijafo?” doin. Odocobil uqa jejenega hewi maaden, “Qeeo, ija Ilaija qee,” aden. Odocob age sisildoin, “Hina je hahun madec dananu ege sumuduquna eufo?” doin. Uqaqa jejenega hewi maaden, “Eu qee,” aden.

²²Odocob age haun sisildoin, “Odi qeefi hina in bahic magaga. Dana age sulgecebil hoqa eu hinadodocnu cel je magecem ege ageca ceseli li maadecnu madoqona,” doin.

²³Odocobil Jon jejenega hewi maaden: “Ija jejeg oso uqa wadauna bibili utai maadena, ‘Tibudna jic tutuc mudeiga!’ adena. Eu odi weleca je hahun madec dana Aisaia uqa maden,” aden.

²⁴Aria, dana age Jon sisildoin eu Farisi suladecebil hoin.

²⁵Odocob age Jon sisildoin, “Hina Anutna Krais qeefi, hina Ilaijaha qeefi, hina je hahun madec dana euha qeefi eetanu dana cajaca wa joadagana?” doin.

²⁶Odocob Jon jejenega hewi maaden, “Ija wana wa joadigina qa age gemona dana oso bilia eu age qee dogina.

²⁷Eu uqa hib tooti hugian. Ija uqana cabi dana me bahic ihoc qee, ija uqa jaih tacec cufalitocwe qee,” aden.

²⁸Ceteteh i cunug Betani jobon Jodan wa naha ono isecna calen. Ono Jon dana cajaca wa jojoaadien.

²⁹Deel osona Jon uqa Jisas uqaca hohon fimei maaden, “Feiga, Anutna Sipsip Nag ihen. Uqa dana cajaca cunug mahana bilegina agena silail cagasiadecnu hon.

³⁰Dana inu ija wele maadem, ‘Ija qee cali hocna uqa bilen. Eunu dana oso ija hib tooti hona eu ija wooltec,’ adem.

³¹Ijadodoc uqanu bahic qee dolom qa Isrel dana cajaca uqanu doqagannu ija wa jojoaadiem hom,” aden.

³²Odimei Jon uqa je iha qasali maaden, “Ija Kis Gun cuhudid cinigwe sao jobonnadec ni uqaca bibilen fem.

³³Ijadodoc uqanu qee dolom qa Anut ija dana cajaca wana wa joadecnu sulteceb hom eu uqa maten, ‘Hina Kis Gun nimei dana osoca bibileb fimeg eu uqa Kis Gunna wa joadigian,’ ten.

³⁴Eu oodon femnu dana i uqa Anut Melah eunu wele qasali maadem,” aden.

³⁵Deel osona Jon uqa uqana malogom lecis gami tawein.

³⁶Tataweig uqa Jisas cocobi nunuen fimei maalen, “Fesia, Anutna Sipsip Nag ihen!” alen.

³⁷Odocob malogom lecis eu ale odi maaleceb dosin eunu ale Jisas toodocobil belein.