Iosua 15:13-20

¹³Kaleba, Iepuna natuna, Iuda nanatunaeao edi oea tupona i mosei, doha Guiau Iosua i heriba, Araba Anaki tamana ena eanua, esana Heberona.

¹⁴Kaleba, Anaki nanatunaeao haiona, Sesai, eo Aimano, eo Talemai i henaudi.

¹⁵Ia abo i sae Debiri tataodi aridi eai: Debiri esana beabeana ede Kiriata‐sepa.

¹⁶Kaleba i ene, Tau esau Kiriata‐sepa i lubi, eo i girihai, abo Akesa, natugu siu, ia monena ea mosei.

¹⁷Otinielu, Kinasa natuna, eanua abo i girihai, abo Akesa i mosei ia monena.

¹⁸Se tavasorao abo Akesa Otinielu i heriba bena tamana arinai oea gagirina esau i aiboda: ena asina eai i pesa: Kaleba i ribalau ia arinai i ene, saha bena u abi?

¹⁹I heuio i ene, u hewoiwoinagu, oea esau tupo eavana u reamao, ea ne bena goila se bunubunuasi hinage u reama. Goila bunubunuasi tupo saesaena, eo tupo dobidobina abo i mosei ia arinai.

²⁰Iuda boganaeao hari bada, hari bada edi oea se soi eanua gamagaridi, eo oea sigasigadi se uridi.