1Penga niyan, doen pa heman doma impekità te Pengolo kanak, so kinità ko se lelebangan neowang kidoen te langit. Se otaw tapay minikagi diyà kanak te ontò dakel se kagi din iling te peg-edop te bodyong, yan se todà minikagi, “Penayit ka diyà, so ipekità ko kamno aw eden se metoman domateng te modi aldaw.”
2Pegketà doen impekità te Espiritu Santo dimateng kanak, so kinità ko se onsedanan te peglowan kidoen te langit, aw doen minonsad kidoen.
3Mèpiya se bawa din iling te bawa te bato meelagà iningedanan haspi aw kornalina. Nepeyongan se onsedanan din te binengonan melonaw iling te bawa te bato meelagà iningedanan esmeralda.
4Nelibedan se onsedanan te doma kelowan teg epat onsedanan, aw doen kelowan teg epat obanen nenenoo kidoen. Mepotì se penenaktun te kedita dan, aw sinengkoban se olo dan te korona ininang te bolawan.
5Migkilem se onsedanan te peglowan, aw dinineg ko heman se daging aw delegdeg te kilat. Kidoen te monà te onsedanan te peglowan, doen pito solò eglegdeg, aw yan se pengilala te Espiritu Santo egpetaga-taga te metolos sikandin pineokit te pito keokit.
6Kidoen heman te monà te onsedanan sìyan, doen iling te lanaw ontò metìngaw iling te ispiho. Kidoen medapag te tangkil te onsedanan te peglowan, doen epat ayam-ayam metolos. Doen medita mata dan diyà te bawa dan aw diyà heman te getan dan.
7Iling te liyon se tagnà ayam-ayam metolos. Iling te nati te baka se ikedowa. Iling te bawa te otaw se iketelo. Iling te banog eglayang se ikeepat.
8Doen enem pakpak te teg sebad-sebad te epat ayam-ayam metolos seini. Nelegeb se lawa dan te medita mata dan, pengkey doton didalem. Aldaw aw delem, gayed dan egdelangan te wedad temanan, aw seini se kagi te delangan dan. “Ontò metòlid se eg-inangen te Timanem. Sikandin se Pengolo eglowan diyà te kedita. Doen den sikandin gebii, aw seini, Aw modi heman aldaw.”
9Timanem se egpenenoo diyà te onsedanan te peglowan, aw sikandin se eked palos kematay te wedad temanan. Sikandin se gayed ipegduyun te sìyan epat ayam-ayam metolos, aw egsegmanen dan sikandin, aw egpesiontongan dan heman.
10Dalem niyan, eglongken heman se kelowan teg epat obanen diyà te Timanem egpenenoo kidoen te onsedanan te peglowan. Egsimbahen dan heman sikandin eked palos kematay te wedad temanan. Insawol dan se menge korona dan kidoen te monà din, so yan se pengilala te pegpedanà dan diyà kandin. Gayed dan migdelangan, kagi dan,
11“E Pengolo day Timanem, melangkaw ka, Aw yan keilangan iduyun ka, aw segmanen ka, aw toloen ka te kedita, So sikona se mig-inang te kedita, aw Lekat te kamno ibeg, ininang no se kedita te doen seini.”
