1Despues de aquel maga mensaje ya mira yo un puerta abierto na cielo. Aquel mismo voz claro y suena como el trompeta que ya oi yo del primer vez, ya habla conmigo, “Subi aqui arriba, cay ay dale yo contigo mira el cosa debe sucede.”
2Enseguidas el Espiritu ya controla conmigo, y ya mira yo enfrente di mio un trono na cielo y tiene uno sentao alla.
3El quien ta senta alla na trono ta brilla brilla gayot como maga alajas de jaspe y sardio y maga piedra precioso, y alrededor del di suyo trono tiene el forma como arco, el verde color de esmeralda.
4Alla alrededor del trono tiene veinte cuatro otro trono donde sentao veinte cuatro anciano. El vestido di ila blanco, y na di ila maga cabeza corona de oro.
5Alla na trono ta man kirlat que kirlat y ta sale tamen el maga sonido del trueno y el grande estruendo. Enfrente del trono ta arde el siete sulu que ta representa el siete espiritu de Dios.
6Y enfrente de ese mismo trono tiene un mar bien ancho y claro como cristal. Alrededor del trono tiene cuatro criatura vivo quien tiene mucho ojos na di ila cuerpo, adelante y detras.
7El primer criatura dol leon, y el segundo criatura dol toro joven, y el acatres criatura cara de gente, y el acacuatro criatura igual na aguila ta bula ya.
8Cada criatura tiene seis alas y ambuslao del maga alas lleno de ojos. Dia′y noche canta′y canta sila sin descanso, “Santo, santo, santo el Señor Dios todo poderoso, quien ta existi antes del creacion y ta existi hasta para cuando.”
9Cuando el maga criatura ya dale gloria y honor y gracias con aquel sentao na trono, quien vivo hasta para cuando,
10el veinte cuatro anciano ya postra na presencia di suyo quien ta senta na trono, y ta adora sila con ele quien vivo hasta para cuando. Ya pone sila na delante del trono el di ila maga corona y ya habla sila,
11“Señor el di amon Dios, uste ta merece para recibi alabanza, honor y poder, cay ya crea uste todo el maga cosas, y por causa del di uste querer esos ya queda creao y ta dale uste con esos el poder para existi.”
