Apokaripxi 4

1

2

3

4

5

6

7

8

9

10

11

12

13

14

15

16

17

18

19

20

21

22

¹Morarame ywy João osenuhmane ropa kakoxi. Mame omõtoh panõ enease totapuruhmakase, kapu aka omõtohme. Mame omi totase ropa ya, rue panõ ynetahpyry osemazuhme ro. Ynara tykase, —Osehko xiaro kakoxi. Imeĩpo ehtoh enepõko ase oya, tykase.

²Mame Ritonõpo zuzenu japoiase. Mame osenuhmase ropa. Kapu ao tuisa apõ moroto nexiase. Moro po imepỹ nexiase typorohse.

³Ẽmyty zemĩme sã nexiase topu zemĩmã samo jasape samo, satoniu maro. Tuisa apõ zomye okohkuri nexiase sewemã samo ezemerauta samo.

⁴Moro tuisa apõ zomye imehnõ apõ nexiase 24mãkomo, parihmã sã nexiase tuisa apõ zomye. Moro po Ritonõpo poetory tõ tamuximãkõ typorohse nexiase, 24me. Upo karimutumã tamuruse toto a. Typarimãke roropa toh nexiase uuru risẽke zupuhpyrykõ rehpo.

⁵Mame tuisa apõ wino neneneh ãko nexiase, panaikato, konomeru konõto roropa, enara. Aritu panõkõ setimãkõ zahnõko nexiase tuisa apõ ẽpataka. Ritonõpo zuzenu setime exiketõ enetupuhtoh nexiase.

⁶Moroto tuisa apõ etonie ikuhpo konõto panõ nexiase, kutei akusasamã panono. Akusasame kuhse nexiase. Tuisa apõ myhto isene exiketõ nexiase asakoropane. Tonure tuhke toh nexiase, ẽmytykõ poko, ĩparykõ poko, enara.

⁷Toiro isene exikety kaikuxi tamuru panõ nexiase, rião panono. Zakorõ pui orutua panõ nexiase. Imepỹ ahno ẽmyty panõ nexiase. Imepỹ pianoimo panõ nexiase pohpoh ãko.

⁸6me taporihke toh nexiase. Tonure tuhke toh nexiase aporirykõ poko, zopino, epoe, enara. Eremiakehpyra toh nexiase saereme, koko, enara. Ynara nase toto, “Kurano, kurano, kurano, Kuesẽkõ Ritonõpo, Imehxo exiketyme mana. Pake exikety ynororo. Seromaroro nae ro mana. Myarotokoro ynororo jũmanatome,” nase toto.

⁹Mame mokaro isene exiketõ eremiaryhtao Ritonõpo imehxo ehtoh poko, tuisamehxo aexiry poko, kure aexiry poko, jũmãme aexiry poko

¹⁰mokaro roropa tamuxime exiketõ 24mãkõ nono pona typorohse toto Ritonõpo ẽpataka. Tapõ po typorohse exikety netaryme, “Kure mase. Jũme orihpỹme mase,” tykase toto eya. Mame typarimãkõ emãko toh nexiase tuisa konõto apõ myhtokoxi. Ynara ãko toh nexiase,

¹¹“Yna esẽ mase Ritonõpo. Emero rihpõme mase. Ritonõpo imehxo mase, ãko ynanase oya emero porehme. Yna tuisary kurã mase. Yna esẽme roropa mase imehxo. Senohne emero tyrise oya okyryryme. Tyriry se oexiryke emero toehse mana. Isene exiketõ roropa toehse,” ãko toto.