1Hatahori Dae-bafo Isi-isik kokolak nateꞌe Ndia hara hehelun fee sarani bubua kahituk kara, boe ma Manetualain natudu fee au matak laen bali. Medak neu ma, au mete-ita lelesu esa neni soik nai nusa tetuk do inggu temak. Boe ma au amanene seluk hatahori fo hara maheren nok bali toꞌis nae, “Mai! Hene ia lain mai leo, fo Au ae atudu o basa hata fo neu ko mori-dadi.”
2Faik naa oo, Manetualain Dula-dalen soꞌuk neni au uni nusa tetuk do inggu temak uu boe. Medak neu ma, au mete-ita kadera man-parenda esa, ma hambu esa nanggatuuk nai lain.
3Saꞌan momodok ma mbilas sama leo batu manggadilak mabelir fo ara seseik kana rae, yaspis ma sardius. Hambu elus esa oo eko-feo kadera man-parenda naa boe. Saꞌan momodok sama leo batu manggadilak samrud.
4Nai mamanak naa oo, hambu kadera man-parenda anak dua hulu haa boe. Ara eko-feo kadera man-parenda manai talada heon naa. Hambu mane leo dua hulu haa ranggatuuk rai kaderar raa. Basa sara pake bua-loꞌa mutik, ma pake solangga man-parenda numa lilo mbilas mai.
5Hambu ndelas sara ranggahadok ratuti-ranatok ruma kadera man-parenda mana nai talada heon naa mai, ma lalai nasapaparak ruun nara moꞌon seli ratuti-ranatok. Hambu aꞌi mbele hitu oo, mbila nai kadera man-parenda naa matan boe. Sira raa, sama leo Manetualain Dula-dalen fo mana naena boboak hitu.
6Nai kadera man-parenda naa matan, au mete-ita nok bali hambu tasi fo oen neu ndoos sama leo titiro. Boe ma au mete-ita horis ta hohoꞌak haa eko-feo kadera naa. Ao-inan nara dea no mata sofek no mata deꞌek. Horis sara raa, sira raono-lalau Manetualain.
7Horis kaesan naa, matan sama leo singa. Nomer kaduan, matan sama leo sapi mane. Nomer katelun, matan sama leo hatahori dae-bafok. Ma nomer kahaan, matan sama leo mbui marambua moꞌok lambu.
8Horis kahaak kara raa, esa-esak naena lidak nee. Nai lidak kara raa dean ma dalen oo sofek no mata deꞌek boe. Hatu-leledon ara soda-helo ta ramaketu rae, “Ai koa-kio Manetualain! Ai makadedemak ai Lamatuan naden! Manetualain naa, malalao ndoos! Manetualain naa, mana naena koasa ta neni babanggak. Manetualain mana nasoda numa lele uluk mai. Manetualain mana nasoda hatematak ia. Ma Manetualain mana nasoda losa doon naa neu!”
9No soda-helo talo naa, ara koa-kio ma fee hada-horomatak neu Manetualain, ma roke makasi neun, nahuu Ana ndia mana nanggatuuk nai kadera man-parenda naa lain, ma Ndia mana masodak losa doon naa neu. Neu ara soda-helo,
10mane leo kadua hulu haak kara raa oo, sendek luu-langgan nara reu Manetualain matan fo mana manggatuuk nai kadera man-parenda naa lain boe. Ara buka heni sira solangga man-parendan, de tao sara reu kadera man-parenda matan fo rakaluku-rakatele neu Ndia mana masodak losa doon naa neu. Boe ma ara koa-kio neun rae,
11“Oo, Manetualain! Ai koa-kio Manetualain! Ai makadedemak Manetualain naden. Manetualain ia, ndia naena haak parenda ai. Lamatuak ia, ai Manetualain! Manetualain ndia nandaa simbok ai kokoa-kikion. Manetualain ndia memak muste simbok ai hada-horomatan. Huu Manetualain mana maena koasa mateꞌen. Ma Manetualain ta neni babanggak mateꞌen. Manetualain ndia adu basa-basan. Manetualain ndia fee masodak neu basa-basan. Basa mana dadik kara, ara dadi, nahuu Manetualain ndia adu sara ena. Basa horis sara lalaꞌen, hambu ani hahaek, nahuu Manetualain ndia baꞌe fee sara ena.”
