1Paľis dikhľom o phundrado vudar pro ňebos. A oda ešebno hangos, so šunďom sar o hangos la trubakero, manca vakerelas a phenďa: “Av kade upre a me tuke sikavava, so pes mušinela paľis te ačhel.”
2A takoj somas andro Duchos. Dikhľom tronos, so ačhelas andro ňebos, a pro tronos vareko bešelas.
3Oda, ko bešelas pro tronos, dičholas avri sar o bar jaspis the sardis a pašal o tronos sas e duha, so dičholas avri sar smaragdos.
4Pašal o tronos ačhenas bišuštar (24) troni a pro troni dikhľom te bešel bišuštar (24) phurederen. Sas urde andro parne gada a pro šere len sas o somnakune koruni.
5Andral o tronos avenas avri o bleski the o perumi a anglo tronos labonas efta jagale lampaša, so hin o efta duchi le Devleskere.
6A anglo tronos sas ajso vareso sar cakluno moros, so dičholas avri sar krištalos. A maškar o tronos the pašal o tronos sas štar džide bitosťi, saven sas pherdo jakha anglunestar the palunestar.
7Ešebno (peršo) džiďi bitosť dičholas sar o ľevos; e dujto dičholas sar e gurumňori; la tritona bitosť sas ajso muj sar le manušes; a štarto dičholas sar orlos, so leťinel.
8Dojekha kale bitosťendar sas po šov kridli a sas len pherdo jakha avrunestar the andrunestar. A rat a džives na preačhen te vičinel: “Sentno, sentno, sentno hin o Raj, o Del, saves hin savori zor, Oda, ko sas, ko hin a ko avela.”
9A furt sar den o džide bitosťi o baripen, e pačiv the o paľikeriben Oleske, ko bešel pro tronos a ko dživel pro furt,
10o bišuštar (24) phureder peren anglal Oda, ko bešel pro tronos, a banďon anglal Oda, ko dživel pro furt. A čhiven peskere koruni anglo tronos a phenen:
11“Tu sal hodno, Rajeja amaro Devla, te lel o baripen, e pačiv the e zor, bo tu kerďal savore veci; tira voľatar sas stvorimen a hine.”
