Revelesen 4

1

2

3

4

5

6

7

8

9

10

11

12

13

14

15

16

17

18

19

20

21

22

¹Navong nakur selusien koanek evus, nales leisanien tamun. En leisanien enek nales voiteh seha en out nesa. Ka rea koa naraengoni mulamu koa musel keih suval amaru, kei vit, “Amai keie, ka nitie minuk asa hekur out en avong koa hemai veah.”

²Hatte tas, Ninin onen Ahi sienau ka nales tai koa mul rondan en vulin ten keihoen en out nesa.

³Aven vihil suval ahat keil koa merentas koa avise en saspa ka karnilian. Ka mul rahit vulin ten keihoen, mitiet vihil suval ahat koa merendas koa avise en emeral.

⁴Ka rahit mari vulin ten keihoen enek, nales out sav keil tatondanien hanumau tai ka ehat (24). Ka elda hanumau tai ka ehat (24) amul en keil ka amusin en eisin tamuoh ka vatluvoluv ten hiasuvien koa vi gol mul en vatie.

⁵Ahil mul vil ka voulul mul mut ka muroh ka en mari vulin ten keihoen onen Ahi. Ka en out enek, en meten kei koa mul en mari vulin enek, ahang oulu (7) amul amukan en ai keil teni. Ahang keil enek avi ninin oulu onen Ahi.

⁶Ka netan en mari vulin ten keihoen enek nalesi suval atas koa mutolas ka mekaikai. Anatin, nalesi vi aet ka vilahil suval kilas. Nales tounah ehat (4) koa amoul amul en usite ehat ten vulin enek, ka mete ka vasi ave.

⁷Koa tai en keil nalesi suval laeon. Koa elu en keil nalesi suval bul. Koa etel en keil nales veinan suval meatin. Ka koa ehat en keil nalesi suval veivakum koa mul muka.

⁸Keil en tai, apoue ahetai (6) koa mete keil mul neim ka hae. Vongien ka meneai keil armusehtei en souen one koa vit: “Votut, votut, votut, vi Ahi Asuv ten Keihoen. Kei mul kosa, mul mulamu, ka hel en avong hemai hekistal veah.”

⁹Tounah ehat (4) enek koa amoul amules amusau en souen keil ten hetetamenien, ten houhouen ka ten masmasien va min kei koa rondan en mari vulin ten keihoen, min kei koa moul lises ka lisenges. Ka navong amumoni mukonek,

¹⁰elda keil hanumau tai ka ehat (24) uva netan min kei koa rondan en mari vulin ten keihoen, min kei koa moul lises ka lisenges. En masmasien, keil ason vatluvoluv one netan veni ka avit,

¹¹“!O Ahi, keik kovi Asuv onomai! Kovinvin keke mehouhou minuk, ka melei kilea hetetamenien ka keihoen onom veni komumon tounah vasi keil. Anatin, musil rendemien onom, kosakin tounah keil akikistal ka amoul.”