1Minikagi heman sikandin, “Solat ka te anghil egtonggò te menge sakop te simbahan kidoen te Efeso. Seini se kagi isolat nikaw. ‘Seini se kagi ko kenyo. Siak se eg-awid te pito bitoen diyà te kowanan ko, aw siak heman se egtonggò te pito solò bolawan.
2Netegahan ko se kedita te eg-inangen niyo. Netegahan ko heman te measeb kaw, aw medalem heman se pedowan niyo te pegtayod niyo te kelimahan. Netegahan ko heman te egsegdahen niyo se otaw eg-inang te medaet kidoen kenyo. Tinandà niyo se otaw egpelingo-lingo te sogounun dan i Cristo, aw kinità niyo te bolelawun dan.
3Netegahan ko heman te medalem pa se pedowan niyo dalem te pegtayod niyo te kelimahan, pengkey pinemilang kaw tandà te pegsalig niyo kanak. Wedà kaw heman lokas.
4Meneng netegahan ko heman te medaet se eg-inangen niyo seini, so pengkey dakel se pedowan niyo kanak kedengan, meneng deitek den seini.
5Eneng-enengi niyo te ontò dakel se pedowan niyo kanak kedengan, aw yan pegselsel kaw so deitek den seini. Todà kaw peg-inang te mèpiya, iling te ininang niyo kedengan. Aw eked kaw pegselsel, yan domoton a kenyo amon ebaten ko se solò lekat kenyo.
6Meneng doen iduyun ko kenyo, so egkebensihan niyo se medaet eg-inangen te menge Nikolayta egkebensihan ko heman.
7Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita te otaw eked dàgi te kededàtan, yan se pekànen ko te pongo te kayo te kaling pedowan wedad temanan intanem kidoen te langit eg-ogpaan te Timanem.’”
8Minikagi heman sikandin, “Solat ka heman te anghil egtonggò te menge sakop te simbahan kidoen te Ismirna. Seini se kagi isolat nikaw. ‘Seini se kagi ko kenyo. Siak se keteboan te kedita, aw siak heman se temanan te kedita. Nematay a, aw neantay a heman lekat te nematay.
9Netegahan ko te egtayod kaw te pegpemilang te doma otaw kenyo. Netegahan ko heman te ontò kaw sagkep, meneng meyaman kaw doton te langit. Netegahan ko heman te egbàtan-bàtan kaw te menge Judiyo. Pengkey eg-aneng-aneng dan te ontò dan Judiyo, meneng migpesakop dan diyà ki Satanas.
10Ikà niyo egkelemitan te kelimahan agpet domateng kenyo. Doen menge otaw kidoen kenyo ipekeleboso i Satanas amon ketegahan aw ontò kaw egsalig kanak. Keilangan pemilangen kaw te eked kenamay, menge sempolò se aldaw. Pengkey imetayan kaw, salig kaw diyà kanak, so begayan ko sikiyo te ontong, sìyan korona te kaling pedowan wedad temanan.
11Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita te otaw eked dàgi te kededàtan, yan se eked detengi te pelumun, sìyan ikedowa pegkematay.’”
12Minikagi heman sikandin, “Solat ka heman te anghil egtonggò te menge sakop te simbahan kidoen te Pergamo. Seini se kagi isolat nikaw. ‘Seini se kagi ko kenyo. Siak se egpengibing te sondang ontò megalang.
13Netegahan ko te pengkey eg-ogpà kaw doton te lonsod eglowanan i Satanas, meneng ontò kaw simalig kanak. Wedà kaw lengà te pegpemenal niyo kanak pengkey kedengan te pegpengimatay ki Antipas. Egkeseligan sikandin migtoladà tepad kanak, aw yan se doun te inimetayan sikandin kidoen te lonsod niyo eglowanan i Satanas.
14Pengkey induyun ko sikiyo, meneng netegahan ko heman te doen medaet eg-inangen niyo, so doen otaw doton kenyo egtaking te kebolalaw intoladà i Balaam gebii. Migtoladà si Balaam ki Balak te peokit te pegboyo din te menge bowad-bowad i Israel amon lomengà dan te pegtaking dan diyà te Timanem. Binoyo din dan amon komaen dan te pengelapen imbegay diyà te kenà benal timanem, aw amon lomayok dan te kenà kandan esawa.
15Doen heman menge doma otaw doton kenyo egtaking te kebolalaw intoladà te menge Nikolayta.
16Pegselsel kaw den. Aw eked kaw, ayas a domoton kenyo amon imetayan ko dan pineokit te sondang eglowà lekat te bahà ko.
17Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita niyo eked dàgi te kededàtan, yan se begayan ko te pan intagò kenyo kidoen te langit. Begayan ko heman sikiyo te bato mepotì sinolatan te kaling ngadan. Se otaw begayan ko kenyan, yan olò se otaw metaga-taga aw sinu se ngadan insolat kidoen.’”
18Minikagi heman sikandin, “Solat ka te anghil egtonggò te menge sakop te simbahan kidoen te Tiyatira. Seini se kagi isolat nikaw. ‘Seini se kagi ko kenyo. Siak se Batà te Timanem. Iling te apoy se mata ko, aw iling te galang impesiag se benis ko.
19Netegahan ko se kedita te eg-inangen niyo. Dakel heman se pedowan niyo kanak. Nelobos se pegsalig niyo kanak. Gayed kaw egtolò kanak. Medalem se pedowan niyo te pegtayod niyo te kelimahan. Se eg-inangen niyo seini, yan se labi pa mèpiya diyà te ininang niyo kedengan.
20Meneng netegahan ko te doen heman medaet eg-inangen niyo, so mepakay diyà kenyo aw toledaan kaw te bayi si Jesebel egpelingo-lingo telekeliwat te kagi te Timanem. Egboyo sikandin te menge sakop ko pineokit te pegtoladà din te mepakay aw lomayok dan te kenà kandan esawa, aw komaen dan heman te pengelapen ipegpemegay diyà te kenà benal timanem.
21Migtagad a kandin amon megselsel te peglayok din te kenà kandin esawa, meneng eked keibeg megselsel.
22Yan se doun te ipelumun ko sikandin, aw mibat sikandin kesekitan. Aw eked pegselsel se kedita te otaw timaking kandin te peg-inang dan te medaet, ipelumun ko dan heman, amon ontò dan kelimahan.
23Imetayan ko se kedita te tinoledaan din, amon ketegahan te kedita te otaw egpemenal te siak se netaga-taga te kedita kidoen te pedowan niyo, aw begayan ko se teg sebad-sebad kenyo te ontong tepad te ininang niyo.
24Doen pa ikegiyen ko diyà te kedita niyo tege Tiyatira wedà taking te medaet intoladà te bayi sìyan, diyà te kedita niyo wedà peg-iling te egtewalen din kebiyasa, meneng lekat iyan ki Satanas. Wedad den doma ipunù ko kenyo,
25meneng keilangan tiboken niyo se pegsalig niyo diyà kanak lamig te peglikò ko.
26Se kedita te otaw eked dàgi te kededàtan aw tomolò te ibeg ko lamig te peglikò ko, isogò ko dan amon lomowan dan diyà te kedita te lonsod te keneyonan,
27so tapay a insogò te Amay ko amon lomowan a diyà te kedita. Lomowan kaw diyà te otaw te kedita te lonsod, aw keilangan tomolò dan kenyo. Meinang dan iling te tibod nelosek, so ontò niyo dan dàgen.
28Begayan ko heman sikiyo te bitoen eg-anyag te medapag aldaw.
29Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal.’”
