1Afta na aibin abum najawan drim, en langa det drim aibin luk wan dowa bin opin langa hebin, en aibin lisin sambodi bin tok langa mi. Imbin jis laik det bambu weya aibin irrim jingat basdam. Wal det sambodi bin dalim mi, “Yu kaman en galimap iya langa mi, dumaji ai garra shoum yu wanim garra hepin bambai.”
2Wal streidawei det Spirit bin teikoba langa mi, en deya langa hebin aibin luk wan speshal boswan tjeya, en sambodi bin jidan ontop langa det speshalwan tjeya.
3Det feis blanga det sambodi bin brabli shainiwan jis laiga purdiwan ston, en wanbala brabli grinwan reinbo bin jidan raidaran langa det speshalwan tjeya.
4Wal det speshalwan tjeya bin jidan rait langa midul langa ola najalot speshalwan tjeya. Deibin abum 24 tjeya raidaran langa det wanbala tjeya, en sambala olmen bin jidan ontop langa ol detlot speshalwan tjeya, en deibin ol werrimon waitwan klos, en deibin ol werrimon speshalwan goldinwan het du.
5Wal laitining en thanda en olkainaba nois bin kamat brom det speshal boswan tjeya langa midul, en 7 lait bin barn lida langa det wanbala speshalwan tjeya. Detlot 7 lait bin detlot 7 spirit blanga God.
6Wal lida langa det wanbala speshalwan tjeya samting bin jidan. Imbin jis laiga shainiwan woda, jis laiga shainiwan glas. En raidaran langa det wanbala speshalwan tjeya fobala najakain enimul bin jandap. Olabat bin abum blendibala ai langa olabat frant en langa olabat bekboun du.
7Det feswan bin luk jis laiga laiyan, en det sekanwan bin luk jis laiga buligi, en det namba thriwan bin abum feis jis laik yunmi, en det namba fo bin luk jis laiga igulok weya im flaiflai.
8Detlot fobala najakain enimul bin abum loda wing jis laiga bard. Siksbala wing deibin abum, en ebriweya langa olabat bodi deibin abum ai, insaid en atsaid deibin abum. Wal detlot najakain enimul bin oldei singsing. Deitaim en naitaim dei neba stap singsing, “Holi, holi, holi, det Brabli Haibala God. Im brabli strongbala nomo lilbit. Imbin jidan Boswan lagijat basdam longtaim, en tudei im stil jidan lagijat na, en im garra kipgon jidanbat lagijat olagijawan.”
9Wal detlot fobala najakain enimul bin oldei singsing lagijat na. En deibin rispek langa God brabli, en deibin oldei gibit theingks garram song langa det sambodi hubin oldei jidan langa det speshalwan boswan tjeya langa midul. Im na jidan laibala olagija.
10Wal wen detlot fobala najakain enimul bin oldei singsing lagijat, seimtaim detlot olmen bin oldei nildan langa graun lida langa det sambodi hubin jidan langa det speshalwan tjeya, en deibin oldei weship langa im. Lagijat na deibin oldei dum, dumaji dei sabi det sambodi im haibala en im jidan laibala olagija. Wal detlot olmen bin oldei tjakamdanbat olabat speshalwan goldinwan het langa graun lida langa det speshal boswan tjeya, en deibin oldei tok langa det sambodi hubin jidan langa det speshalwan tjeya.
11“Yu na Bos blanga melabat en God blanga melabat. Nobodi kaan jidan brabli haibala garram pawa. Oni yu na jidan brabli haibala garram pawa. Oni yu na melabat gin rispek. Oni yu na melabat gin gulum Bos. Dumaji yu na bin meigim ebrijing. Yu na bin gibit laif langa ebrijing, dumaji yubin wandi gibit olabat laif.” Lagijat na detlot olmen bin oldei tok.
