IKUƆ́ NÌÙBƐ̀ 7:19-30

¹⁹Kɛ̀ imɑɑ mmɑì kɑ̀ɑ́kɛ́ dɛ̀mɑrɛ̀ ikuɔ́ yɛ̃ ndɛ̀ɛ̀ sĩ̀ mbɛ̀ bɑ́ɑ́ ì di, bɛ̀ɛ ì cɔ́u. Wèè wenni ikuɔ́ yɛ̃mmɛ̀ weè bo nɑ kɛ́di mɛtɑummɛ̀ kó fɛɔ̃̀fɛ̀ kó imɑɑ.

²⁰Kɛ̀ wèè sĩ̀ nyikuɔ́ yɛ̃mmɛ̀ kɛ ì cɑ̀ɑ́kɛ́ bɛ̀ɛ ò dènnɛ Isidɑyɛɛribɛ tĩ̀nnì miɛkɛ.

²¹Kòò mɔù kɑ̀ɑ́kɛ́ dɛ̀mɑrɛ̀ ikuɔ́ yɛ̃ ndɛ̀ɛ̀ sĩ̀ kòo nìtì nwe yoo kuwɑnwɑnkù yoo dɛ̀tɛrɛ̀ mɑrɛ̀ ikuɔ́ yetɛ dɛ̀, kɛ cɑ̀ɑ́kɛ́ fɛɔ̃̀fɛ̀ bɛ̀ n fèútɛ́ fɛ̀ mɛtɑummɛ̀ kpɛ́í nfɛ kó imɑɑ, dɛ yiɛ̀ mbɛ̀ɛ ò dènnɛ Isidɑyɛɛribɛ tĩ̀nnì miɛkɛ.

²²Kɛ̀ ti Yiɛ̀ nKuyie nni nsɔkɛ́ ku nɑ́ɑǹtì kɛ́nɑ́kɛ́ Mɔyiisi kɛ dɔ̀:

²³Nɑ́kɛ́ Isidɑyɛɛribɛ kɛ tú: Di bɑ́ nyo mmɛnɑɑkùɔ̀ nnɛ̀ ipe nɛ̀ sibɔɔ́ dɛ kɔ̃mɛ.

²⁴Kɛ̀ fɛɔ̃̀fɛ̀ mɑfɛ̀ ku yoo musĩ̀mmù fɛ̀ pĩ, di bɑ́ɑ́ cɑ́ɑ́kɛ́ fɛ kùɔ̀, di nɛ́ bo nɑ kɛ́ mmɛ̀ pĩ̀ńnɛ̀ mutɔ̃mmú.

²⁵Kòò mɔù cɑ̀ɑ́kɛ́ mɛkùɔ̀ mbɛ̀ ɔ̃ɔ̃ n kuɔ fɛɔ̃̀fɛ̀ kɛ́dɛitɛ mɛ̀ kɛ́tuɔ. Bɛ̀ɛ ò dènnɛ Isidɑyɛɛribɛ tĩ̀nnì miɛkɛ.

²⁶Bɑ́ kɛ̀ di bo kɛ̀ɛ̀ bíɛ́kɛ̀ di bɑ́ nyo mmɛyĩ̀ĩ̀, bɑ́ tɛnɔ̀tɛ̀ kɔ̃mɛ yoo itɑ̀ɑ̀kɛ inɑ̀ɑ̀ kpɛrɛ kɔ̃mɛ.

²⁷Kɛ̀ wèè di mɛyĩ̀ĩ̀ mbɑ́ kòò tu wè bɛ̀ɛ ò dènnɛ Isidɑyɛɛribɛ tĩ̀nnì miɛkɛ.

²⁸Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀: Nɑ́kɛ́ Isidɑyɛɛribɛ kɛ dɔ̀:

²⁹Kòò mɔù n fèútɛ́ fɛɔ̃̀fɛ̀ wèe dɛitɛ kumɑɑ nkùù tu n kɔku.

³⁰Wèe dɛitɛ o mɔ́mmuɔ nyìì tu n kpɛyi, mɛkùɔ̀ nkpɛrɛ nɛ̀ dicĩ̀ncĩ̀nnì kɛ́ dɛ̀ nni mbɛnkɛ.