IKUƆ́ NÌÙBƐ̀ 26:2-15

²Dí mpĩ́ n di nɑ̀kɛ́ tì siom̀pùsi ĩ́nkɛ̀, kɛ́ndé n tɑummɛ̀ tou. Míì tu di Yiɛ̀ nKuyie.

³Kɛ̀ ti Yiɛ̀ nKuyie mbɛ́innɛ̀ Isidɑyɛɛribɛ kɛ dɔ̀: Kɛ̀ di yie nkɛ pĩ́ n tié nnɛ̀ n tɑnnɔ̀ kɛ dɔɔri dɛ̀ yɛ̃mmɛ̀,

⁴m bo ndi duɔ̀ nfɛtɑɑfɛ̀ fɛ mɔ̀nnì, kɛ̀ di pɑɑ nní mpɛí mɛsɑ̀ɑ̀ nkɛ̀ di tebiiti mpɛí mɛsɑ̀ɑ̀.

⁵Kɛ̀ di níí mpuotì tidiitì kɛ̀ di tebiitii binɛ̀, kɛ̀ di ntɔ̃ũ di tebiiti kɛ́tuɔkɛnɛ̀ di bo buɔtímɛ̀ tidiitì, kɛ̀ di nyo kɛ sɑ̀nnɛ̀ kɛ́mbo bɑ́ dɛ̀mɑrɛ̀ í di kɔɔ́nnɛ̀.

⁶Kɛ̀ n di duɔ́ ndiwɛ̀ì dihɛì miɛkɛ, kɛ̀ di níí nduɔ́ kɛ í yĩɛ̃̀kù. Kɛ̀ n kɛi ndɛsĩ̀nnɛ̀, mudoò tɛ̃́nkɛ bɑ́ɑ́ ɑ̃nnɛ́ di kó kɛtenkɛ̀ miɛkɛ.

⁷Kɛ̀ di mbɛtì di dootitɔbɛ̀ kɛ bɛ̀ kɔ̀ù.

⁸Di miɛkɛ bɛnìtìbɛ̀ bɛ̀nùmmù níí bo mbɛtì tɛkɔ̀ùtɛ̀ (100), kɛ̀ tɛkɔ̀ùtɛ̀ mbɛtì tɛkɔupípíítɛ̀ (10000) kɛ̀ di bɛ̀ kɔ̀ù.

⁹Kɛ̀ nní mbo difɔ̃nkó kɛ́duɔ́ nkɛ̀ di piɛ́ kɛ̀ nní mpĩ́ n di dɔ̀ɔ̀nɛ̀ mɛ̀ɛ̀ tɑummɛ̀.

¹⁰Kɛ̀ di níí nyo ndi diitì kɛ̀ tipɑ̀ntìi bi, kɛ̀ di cṹũnní tikótì kɛ́ɑ̃nnɛ́ tipɑ̀ntì.

¹¹Kɛ̀ n cĩ́ɛ̃̀tɛ̀ mbo di cuokɛ̀ sɑ̃́ɑ̃̀, m bɑ́ɑ́ di pɛ̃̀.

¹²M bo mbo di cuokɛ̀, kɛ di te kɛ̀ di tú n kɔbɛ.

¹³Mí ndi Yiɛ̀ nKuyie mmíì di te, kɛ di dènnɛní Esibiti. Kɛ̀ dɛ̀ bo yie nkɛ̀ di tɛ̃́nkɛ bɑ́ ntú tidɑɑtì, kɛ toutɛ́ di tuɔ Esibiti kɔbɛ do di toú nyɛ̀, kɛ dí nɑ kɛ ɔ̃ nkérí kɛ yíéo.

¹⁴Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́bɛ́i nkɛ dɔ̀: Kɛ̀ di mɛ nyetɛ n kpɛti kɛ í tũ̀nnɛ n tɑnnɔ̀ yɛmɔu,

¹⁵kɛ̀ di bùtínnɛ́ n kuɔ́ kɛ pɛ̃̀ n tié, kɛ̀ di tɔ̃̀tɛ n di dɔ̀ɔ̀nɛ̀ mɛ̀ɛ̀ tɑummɛ̀, kɛ yóu kɛ tɛ̃́nkɛ í dɔɔri n tɑnnɔ̀ yɛmɔu yɛ̃mmɛ̀.