Levi 26:2-15

²“Naha ni leho na Parava Nimalo. Mu togoa a mailo nau. Iau e BAKOVI DAGI, a takia a ngava iea.

³“Mua bara mu ramai a vinara nau, mu rata a maki a ngaru mu gu rata,

⁴bara ratea a vala i boru, i rata a maki ni kani ri rike kamumu na malala ne mua. A maka kai bara ri vua kamumu.

⁵A maki ni kani bara ri bele kupo. Bara mu mirio mavonga a vit i harena na tahuna a vain i rara ni pasi. Bara mu pasi mavonga a kanena vain i rara, i harena na tahuna mu varo tabu a vit. Bara mu kani mu maru, mu made kamumu na malala ne mua.

⁶“Iau bara habi a nivalemu ne mua mu made kamumu. Na tahuna mu mahita, i uka ma mu gu mangenge vona tara maki. Ga lili vuroki a maka livoa hateka na robo ne mua. E huriki a pile i uka ma ri gi ratapile mua.

⁷Na tahuna mu vaubi turane huriki a pile, bara mu valili ne ria, mu ratapile ria.

⁸A bakovi i ala lima ne mua bara ri valili na pile ala ravulu mule ma murina balaka taku (100). A bakovi i ala ravulu mule ma murina balaka taku (100) ne mua bara ri valili na pile ala ravulu rangale (10,000), ri ratapile ria.

⁹“Iau bara rata kamumu mua, a habi ne mua e huriki e tune mua ri ala kupo. Bara vakatorea a ngava dagi a takia ne mua hosi.

¹⁰A maki ni kani mu mirio na pida muga, bara i tabuli i harena na pida muri. A maki mu kani kaleva, bara mu vuroki tala, mu bole a maki ni kani karaba, mu ru na murine ria.

¹¹Iau ga made na mailo nau na kurukurune mua, i uka ma ga ngalahere ne mua.

¹²Ga laho turane mua, ge iau a Vure ne mua, mua ge mua e huriki a tara nau.

¹³Iau e BAKOVI DAGI a Vure ne mua. Hosi mua a vorakato o Egipto ni vakavora hateka, muri a tuli tala mua vonga, a taparaki valai mua koea, lakea i uka ma ge mua a vorakato tabu ne ria. A ratapilea a nitora na bakovi i vakavora hateka mua, ngane mu laho na pesivahane mua.

¹⁴“Pali mua mu longotaro a ngavagu i uka ma mu ramai a vinara nau,

¹⁵mu putu puru a vinara nau, mu ngalahere na ngavagu, mu longotaro a ngava dagi a rata turane mua,