IKUƆ́ NÌÙBƐ̀ 24:1-9

¹Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀:

²Nɑ́kɛ́ Isidɑyɛɛribɛ kɛ̀ bɛ̀ dɑ duɔ́ nhodìfíè kó mɛkɔ̀sɑ̀ɑ̀mɛ̀ di bo ntuɔ̀nnɛ̀mɛ̀ tɛfitíkɛ̀kɛ̀tɛ̀ dɛyuo ndɛmɔu.

³Kɛ̀ Anɔɔ tɛ̀ ĩ̀ńnɛ́ mɛtɑummɛ̀ tou miɛkɛ kuyɑ̀ɑ̀kù kùù pì mɛtɑummɛ̀ tɔu ĩ́ĩ́kú dɛ̀ ku ììkɛ̀, kɛ̀ tɛ̀ níí nyié nkɛ cɔ́ú mí ndi Yiɛ̀ nKuyie n yììkɛ̀ kɛ́wentɛ́nɛ̀. Dɛ̀ yóó ntú ikuɔ́ nyi di kpɛ́í nnɛ̀ di yɑɑ̀bío sɑ̃́ɑ̃̀.

⁴Anɔɔ yóó dɛ nyĩ́nnɛ́ tɛfitíkɛ̀kɛ̀tɛ̀ mɛsɔɔ nsɑ̀ɑ̀mɛ̀ kpɛtɛ kɛ́cɔ̃nnɛ́ tɛ búkúsí kɛ̀ dɛ̀ níí ncɔ́ú nkɛyènkɛ̀ kɛmɔu n yììkɛ̀.

⁵A wɑɑ́ mmuyuo nsɑ̀ɑ̀mù kɛ́dɔɔ̀nɛ̀ pɛ̃́ɛ̃̀bɛ̀ tɛpíítɛ̀ nɛ̀ bɛ̀dɛ́bɛ̀ bɑ́ wèè pɛ̃́ɛ̃̀ kòo yuo ncɛ̃́ɛ̃́kù mbo cìdóòbɛ̀ bɛ̀kuɔ̀.

⁶Kɑ̀ɑ bɛ̀ dɑɑ́ mmɛsɔɔ nsɑ̀ɑ̀mɛ̀ kóo tɑ́bùrì ĩ́nkɛ̀ icuɔ́ ìdɛ́ì bɛ̀kuɔ̀ bɛ̀kuɔ̀ mí ndi Yiɛ̀ nKuyie n yììkɛ̀,

⁷kɛ́cóú mbɑ́ kùù cuɔ́ ĩ́nkɛ̀ tihúúntì sɑ̀ɑ̀tì bɛ̀ yóó tuɔ ntì, kɛ̀ dɛ̀ɛ bɛnkɛ pɛ̃́ɛ̃̀ omɔu túmɛ̀ mí ndi Yiɛ̀ nKuyie n kou.

⁸Bɑ́ tɛ̀ɛ̀ om̀pùtɛ̀ ntɛ bɛ̀ níí yóó dɑɑ́mmɛ̀ dɛ kóo pɛ̃́ɛ̃̀ mɛsɔɔ nsɑ̀ɑ̀mɛ̀ kóo tɑ́bùrì ĩ́nkɛ̀ mí ndi Yiɛ̀ nKuyie n yììkɛ̀. Díndi Isidɑyɛɛribɛ di dò nkɛ́ mmɛ ndɔɔri sɑ̃́ɑ̃̀.

⁹Anɔɔ nɛ̀ o bí bɛɛ̀ yó nte dɛ kóo pɛ̃́ɛ̃̀, bɛ̀ níí nkɑri mɛtɑummɛ̀ tou kó kudɑ̀nkù kɛ́ bɛ̀ cɑ̀ɑ́kɛ́ kɛ yɛ̃́ bɛ̀ bɛ̀ nni mpɑ̃mɛ̀mu kɛ̀ bɛɛ̀ cɑ̃̀ɑ̃́ nkɛ̀ bɛɛ̀ dò nkɛ́ bɛ̀ di. Dɛ kó ikuɔ́ yó mbomu sɑ̃́ɑ̃̀.