IKUƆ́ NÌÙBƐ̀ 20:6-27

⁶Kɛ̀ wèè bùtínnɛ́ mí ndi Yiɛ̀ nKuyie nkɛ kɔrì bɛ̀ɛ̀ bourí tinubootì nɛ̀ bɛpɑ̃ɑ̃bɛ̀ borɛ̀, m miɛkɛ yóó ò yɛ̀mu kɛ̀ nhò dènnɛ o kɔbɛ miɛkɛ.

⁷Ncɑ̃́ɑ̃́nnɛ̀ kɛ dò mpɑ́í pɑ́í mí ndi Yiɛ̀ nKuyie mmíì di te.

⁸Dí ntũ n tié nkɛ ndɔɔri n yɛ̃mmɛ̀ mí ndi Yiɛ̀ nKuyie mmíì di tɑ̃ɑ̃tɛ́ kɛ̀ di cɑ̃́ɑ̃́.

⁹Wèè sɑ̃̀ɑ̃́ nho cicɛ yoo o yɔ̃ bɛ̀ɛ ò kùɔ. Ò kùɔ omɑ́ɑ̀ ndi kɛ yɛ̃́ o sɑ̃̀ɑ̃́mmɛ̀ o cicɛ nwe yoo o yɔ̃.

¹⁰Kɛ̀ wèè duɔ́nɛ̀ otɔù pokù bɛ̀ɛ bɛ̀ kùɔ bɛdɛ́, wenwe nɛ̀ dɛ kóo nitipòkù.

¹¹Kòò mɔù duɔ́nɛ̀ o cicɛ pokù bɛ̀ɛ bɛ̀ kùɔ bɛdɛ́ wenwe nɛ̀ dɛ kóo nitipòkù. Bɛ̀ kùɔ bɛmɑ́ɑ̀ ndi.

¹²Kɛ̀ wèè duɔ́nɛ̀ o birɛ pokù ò dɔ̀ɔ̀ isɔkɛ nyi bɛ̀ɛ bɛ̀ kùɔ. Bɛ̀ kùɔ bɛmɑ́ɑ̀ ndi.

¹³Kòò mɔù duɔ́nɛ̀ onitidɔ̀ù bɛ̀ dɔunɛ̀mɛ̀ onitipòkù, bɛ̀ dɔ̀ɔ̀ isɔkɛ nyi, bɛ̀ɛ bɛ̀ kùɔ bɛdɛ́. Bɛ̀ kùɔ bɛmɑ́ɑ̀ ndi.

¹⁴Kòò mɔù po onitipòkù kɛ wɛ̃̀tɛ kɛ tùótɛ́ dɛ kóo nitipòkù yɔ̃, isɔkɛ nyi bɛ̀ɛ bɛ̀ cɔ́u nwenwe nɛ̀ dɛ kóo nitipòkù kɛ́dɛitɛ isɔkɛ di cuokɛ̀. Bɛ̀ kùɔ bɛmɑ́ɑ̀ ndi.

¹⁵Kòò mɔù duɔ́nɛ̀ fɛɔ̃̀fɛ̀ bɛ̀ɛ ò kùɔ kɛ́kuɔ dɛ kó fɛɔ̃̀fɛ̀.

¹⁶Kòo nitipòkù mɔù yóu kɛ̀ fɛɔ̃̀fɛ̀ ò duɔ́nɛ̀ bɛ̀ɛ ò kùɔ kɛ́kuɔnɛ̀ dɛ kó fɛɔ̃̀fɛ̀. Dɛ̀ kùɔ dɛmɑ́ɑ̀ ndi dɛdɛ́.

¹⁷Kòò mɔù puokɛ o tɑ̃ũ̀ kɛ̀ bɛ̀ cɑ̃̀ɑ̃́ mbɛ yɔ̃ yoo bɛ cɑ̃̀ɑ̃́ mbɛ cicɛ, kòò ò duɔ́nɛ̀ ifɛi kpɛrɛ ndɛ. Bɛ̀ɛ bɛ̀ dɛ̀itɛ bɛ botí kɔbɛ miɛkɛ bɑ́ wè kòò nwúó, dɛ kó mɛyɛi mbo bɛ yɔ ĩ́nkɛ̀ nkɛ.

¹⁸Kɛ̀ wèè mɛ nduɔ́nɛ̀ onitipòkù ò yùɔ́ ndìì mɔ̀nnì, kɛ yɑ̀ o yɔ́ntì bɛ̀ɛ bɛ̀ dènnɛ Isidɑyɛɛribɛ miɛkɛ. Kɛ yɛ̃́ bɛ̀ yɛ̃́mɛ̀mu bɛdɛ́ ò yùɔ́mmɛ̀ kɛ duɔ́.

¹⁹Òmɔù bɑ́ɑ́ duɔ́nɛ̀ o yɔ̃ nɑntɛ̀ yoo o yɔ̃ kóo kótì yoo o cicɛ tɑ̃ũ̀. Di tú mɛyĩ̀ĩ̀ mmɛ̀mɑ́ɑ̀ kɔbɛ mbɛ, kòò mɛ̀ dɔ̀ɔ̀ bɛɛ̀ yóó tɔ dɛ kó mɛyɛi. Wèè mɛ̀ dɔ̀ɔ̀ wenwe nɛ̀ ò duɔ́nɛ̀ wè bɛ̀ tɔ bɛdɛ́ ndi dɛ kó mɛyɛi.

²⁰Kɛ̀ wèè puokɛ o cicɛ nɑntɛ̀ pokù yoo o cicɛ kóo kótì kou bɛdɛ́ bɛ̀ɛ tɔ dɛ kó mɛyɛi. Bɛ̀ bo kú bɑ́ bɛ̀ í mɔ̀ɔ̀tɛ dɛbirɛ.

²¹Wèè puokɛ o nɑntɛ̀ pokù yoo o kóo kótì pokù ò sĩ̀nkùnnɛ omɑ́ɑ̀ ndi, bɛ̀ bɑ́ɑ́ pɛ́tɛ́ dɛbirɛ.

²²Dí mpĩ́ n di nɑ̀kɛ́ tì timɔu nɛ̀ n tié nkɛ́ndɔɔri dɛ̀ yɛ̃ mmù kɛ̀ dɛ̀ɛ yie nkɛ̀ dihɛì n di kɔrinɛ̀ dì bɑ́ɑ́ di tɔ̃́.

²³Di bɑ́ɑ́ tũnnɛ ibotí n yóó bɛti ì dɛ kó dihɛì miɛkɛ ì borimɛ, bɛ̀ mɛ ndɔ̀ɔ̀ kɛ̀ m bɛ̀ pɛ̃̀.

²⁴N di nɑ̀kɛ́mu kɛ tú: Míì mɔ́mmuɔ nyóó di duɔ́ ndɛ kó kɛtenkɛ̀, mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ nkɛ̀. Mí ndi Yiɛ̀ nKuyie mmíì di te kɛ di cɑ̃̀ńnɛ́ nɛ̀ ibotí tɛì.

²⁵Mbɑɑ̀tìnɛ̀ tũnkɛ́ iwũɔ̃, n yɛ̃ ndí nyo nyì nɛ̀ n yɛ̃ ndí nci ì. Di bɑ́ɑ́ di n yɛ̃ ndí nci kùù wɑnwɑnkù yoo tɛ̀ɛ̀ nɔ̀tɛ̀ yoo dɛ̀ɛ̀ bɑmbɑɑ̀nnɛ̀ kɛ́sĩnkùnnɛ dimɑ́ɑ̀.

²⁶Ndònnɛ̀ pɑ́íí, kɛ́ncɑ̃́ɑ̃́ nkɛ tú n kɔbɛ, kɛ yɛ̃́ mí ndi Yiɛ̀ nKuyie ndòmmɛ̀ pɑ́íí nwe, kɛ̀ míì di cɑ̃̀ńnɛ́nɛ̀ ibotí tɛì, kɛ̀ di bo ntú n kɔbɛ.

²⁷Di miɛkɛ kòo nitidɔ̀ù mɔù yoo onitipòkù tu opɑ̃ũ̀ yoo ò boorí tinubootì, bɛ̀ɛ ò bùɔ́tí yɛtɑ̃́rɛ̀ kɛ́kuɔ. Ò kùɔ omɑ́ɑ̀ ndi.