6सु मुर बेक्शो मुर रे लोव़ पाइब नु लिंक्यु कोव़ब आन कली “वारच पयी” दे आन बाक्तीके लाइबा, गो मेको कली ब्रोंइचा मगेथु, आ मुर आन दाते रे क्याम्नुङ। लेवी १९:३१
7मोपतीके आं कली जिम्मा गेंसीशा आं के दुमीन। मारदे हना गो परमप्रभु यावे, इन परमप्रभु नङ। लेवी १९:२
8आं फुल्लुम मुशा ब्रेक्शो लोव़ इन थुंम वोइश्शा टिने। गो परमप्रभु यावे नङ। गो इन कली आं खोदेंशो सेल्नुङ।
9सुमी आ आंम आफ आस कली सराप पाइक्बा, मेको मुर कली साइक्चा माल्ब। आ आंम आफ आस कली सराप पाइक्तीके साइक्चा पुंइसीब। प्रस्थान २१:१७
10सुइ मुर अरु आन मीश नु इप्त हना, मेको पाइब निम्फा आस कली साइक्चा माल्ब। प्रस्थान २०:१४; २सामुएल ११:४; यूहन्ना ८:५
11सु आ आफ आ मीश नु इप्बा, मेकोम आ आफ कली मुने तोक्ब। मेको निम्फा आस कली साइक्चा माल्ब। मेको साइक्चा पुंइसीनीस। लेवी १८:६-२३
12सु आ चाइमी नु इप्बा, मेको निम्फा आस कली साइक्चा माल्ब। मेको दूली पा मेको थम मरिम्शो बाक्ब। मेको साइक्चा पुंइसीनीस।
13सुइ मुर मीश मुर नु इप्शो खोदेंशो पा वोंइश मुर नु इप्त हना, मेको थम ग्रांग्रा दितीक बाक्ब। मेको आस कली साइक्चा माल्ब। मेको थमा पा साइक्चा पुंइसीनीस।
14सु मुर ममा नु आ तमी निम्फा नु इप्बा, मेको काइ मरिम्शो बाक्ब। मेको सां आन कली चोचा माल्ब। इन दातेमी मोदेंशो मरिम्शो मदुम्ल।
15सुइ वोंइश मुर बस्तु भाव नु इप्त हना, मेको कली साइक्चा माल्ब। मिनु मेको बस्तु कली यो साइक्चा माल्ब।
16सुइ मीश मुर बस्तु भाव नु इप्त हना, मेको मीश मुर नु बस्तु निम्फा आस कली साइक्चा माल्ब। मेको साइक्चा पुंइसीनीस।
17सु मुर आ दिदी बहिनी, आ आंम आ तमी कि आ आफ आ तमी नु इप्त हना, मेको थम मुने बाक्ब। मेको निम्फा आस कली आस मुर आन दाते रे नेल्लेम तचा ङा पा साइश्शा क्याम्चा माल्ब। मेकोमी आंम आ समी नु इप्तीके सजाइ गेचा पुंइसीब।
18सुइ मुर रां ब्रोल्शो मीश मुर नु इप्त हना, मेको निम्फा आस कली आस मुर आन दाते रे साइश्शा क्याम्चा माल्ब। मारदे हना मेको वोंइश मुरुमी मीश मुर आ हुश यितीक ताप्तु। मिनु मीश मुरुमी चहिं आ हुश यितीके कोंइताक्व। लेवी १५:२४
19इन ममा आ लोक्ब नु इन आफ आ समी नु मइपीन। मारदे हना मो पाइतीनी हना, आंम खिं ङा मुर कली मुने तोक्नीनी। मेको सजाइ ताइनीस।
20सुइ मुरुमी आ बोडो, बकान्छा कि मामा आ मीश नु इप्त हना, मेकोमी आ बोडो, बकान्छा कि मामा कली मुने तोक्ब। मेको सजाइ जचा पुंइसीनीस। मिनु आल मथिथु बेक्नीस।
21सुमी मुरुमी आ भोग्यु कि बोहारी चाक्बा, मेको ग्रांग्रा दिशो बाक्ब। मेकोमी आंम लोक्ब कली मुने तोक्ब। मिनु आल मथिथु बेक्नीस।
22गेपुकीमी आं फुल्लुम मुशा ब्रेक्शो लोव़ नु आं पाबो, दे अरेशो लोव़ नेल्ल तुइश्शा पचा माल्नीनी। मो मपाइतीनी हना, गो इन कली चाक्शो रागीमी इन कली उक्बे पा ताइक्ब।
23गे इन ङोंइती खेरशो रागी रागी ङा मुर आन पशो मपने। मेकोपुकीमी मोदेंशो नेल्ल पाम्तेक्म। मोपतीके गो मेको आन कली तशा थम ग्रांग्रा दीती।
24तन्न गो इन कली मेको आन रागी इन के दुम्ब। गो इन कली गेनुङ, देंती। मिनु मेको रागीम दूध नु खुदो शुश बाक्ब। गो परमप्रभु यावे, इन परमप्रभु नङ। मिनु गो इन कली रागी रागी ङा मुर रे तिल्शा योव़तन्नी। प्रस्थान १९:५-६
25मोपतीके गेपुकीमी ग्रांग्रा मदिशो नु ग्रांग्रा दिशो जन्तु नु ग्रांग्रा मदिशो नु ग्रांग्रा दिशो चिक्ब तुइश्शा तिल्चा माल्नीनी। गेपुकीमी ग्रांग्रा दिशो जन्तु, चिक्ब नु खपीम ग्रेशा गाक्ब जन्तु रे आंम कली ग्रांग्रा दिशो मसेल्सीन। मारदे हना मेको ग्रांग्रा दिशो बाक्नीम, दे शेंताक्ङ। लेवी ११:-
26गेपुकी ग्रांग्रा दिशो क्येङा ङोन बाक्शो दुमीन। मारदे हना गो ग्रांग्रा दिशो क्येङा ङोन बाक्शो परमप्रभु यावे नङ। मिनु गो इन कली आं मुर दुम्चा कली अरु मुर रे तिल्शा योव़तन्नी।
27सु इन दातेमी वोंइश मुर कि मीश मुर बेक्शो मुर रे लोव़ पाइबा कि लिंक्यु कोव़नीम, मेको आन कली साइक्चा माल्ब। मेको आन कली फुल्लु आप्शा साइक्चा माल्ब। मेको साइक्चा पुंइसीनीम’ दे इस्राएली आन कली शेंदो” दे परमप्रभु यावेमी मोसा कली देंत। प्रस्थान २२:१७
लेवी 20
लेवी 20:6-27