IKUƆ́ NÌÙBƐ̀ 17:5-11

⁵Kɛ̀ di níí dɔ́ kɛ́ n féútɛ́ dɛ̀, dí dɛ̀ tɔní kɛ́duɔ́ nyikuɔ́ nìùtì mɛtɑummɛ̀ tou bòrìnùù, kòò dɛ̀ nni fíé mɛtɑummɛ̀ kpɛ́í,

⁶kɛ́cóú mmɛyĩ̀ĩ̀ ndiwũɔ̃tɔ̀nnì ĩ́nkɛ̀ dìì bo mɛtɑummɛ̀ tou ììkɛ̀ kɛ́tuɔ mmɛkùɔ̀ ndipɑ̃nnì ndi dìì kó kufɔ̃ɔ̃ku n nɑɑti.

⁷Di bɑ́ m bútínnɛ́ kɛ́nfeu iwũɔ̃ sibɔɔtenkɑɑnìi sìì dò nyɛbɔdɑkɛ̀. Dɛ kó ikuɔ́ yó mbomu sɑ̃́ɑ̃̀ di kpɛ́í nnɛ̀ di yɑɑ̀bío.

⁸Á tì mbɛ̀ nɑ̀kɛ́ kɛ̀ bɛ kóò mɔù yoo bɛpɔ̀ɔ̀bɛ̀ bɛ̀ɛ̀ bɛ̀ bonɛ̀, kòò mɔù n fèútɛ́ fɛɔ̃̀fɛ̀ kɛ tùɔ nyoo ò bɑɑ fɛ̀ nni nfèútɛ́mu,

⁹kɛ í fɛ̀ kɔ̀tɛnɛ̀ní mɛtɑummɛ̀ tou borìnùù, kɛ fɛ̀ nni nfèútɛ́ bɛ̀ɛ ò dènnɛ Isidɑyɛɛribɛ miɛkɛ.

¹⁰Di miɛkɛ kɛ̀ di kóò mɔù di mɛyĩ̀ĩ̀ nyoo bɛpɔ̀ɔ̀bɛ̀ bɛ̀ɛ̀ di bonɛ̀ kɛ̀ bɛɛ̀ kóò mɔù mɛ̀ di, bɑ́ mùù botí kó mɛyĩ̀ĩ̀, m miɛkɛ bo ò yɛ̀, kɛ̀ nh ò dènnɛ Isidɑyɛɛribɛ miɛkɛ.

¹¹Kɛ yɛ̃́ mufòmmu bomɛ̀ mɛyĩ̀ĩ̀ mmiɛkɛ nkɛ. Dɛɛ̀ te kɛ̀ n yɛ̃ ndí mmɛ ndɔɔrinɛ̀ ikuɔ́ diwũɔ̃tɔ̀nnì ĩ́nkɛ̀ di yɛi nhũtímù kpɛ́í, kɛ́nfòù, mɛyĩ̀ĩ̀ mmɛɛ̀ ɔ̃ nte kòo nìtìi wenkɛ.