Hebreo 5

1

2

3

4

5

6

7

8

9

10

11

12

13

¹Aw pemellien te menge Judiyo se otaw meinang telekagon dan diyà te Timanem, sikandin se seligan te menge doma otaw amon megkagon kandan diyà te Timanem. Sikandin se egkinawà te menge ibowang dan diyà te Timanem. Sikandin heman se egbegayan dan te ayam-ayam imetayan tandà te salà ininang dan.

²So otaw heman sikandin egpekesalà, yan doen heman keido din diyà te menge doma otaw egpekesalà aw egsoway lekat te ibeg te Timanem.

³So egpekesalà heman sikandin, yan keilangan doen ayam-ayam imetayan din tandà te kandin salà, iling te pegpengimatay din te ayam-ayam tandà te salà te menge doma otaw.

⁴Eked kepakay aw megpepallì se otaw te kandin pegkeotawun amon meinang sikandin telekagon te Judiyo, so keilangan Timanem se tomawal te otaw meinang telekagon te Judiyo. Iling kenyan se pegpemallì te Timanem ki Aaron gebii.

⁵Iling heman kenyan si Cristo, so wedà sikandin pegpepallì te kandin pegkeotawun amon meinang sikandin Telekagon tadon. Ininang si Cristo melangkaw te peg-ikagi te Timanem diyà kandin, “Sikona se Batà ko, aw siaken se Amay nikaw.”

⁶Minikagi heman se Timanem diyà kandin, “Inangen ko sikona Telekagon te wedad temanan, iling te pegkagon i Melkisedec gebii.”

⁷Pegtawal-tawal i Jesus diyà te Amay din dalem te peg-ogpà din dini lanto te tanà, seletà migpegais sikandin aw migkelag, so mekebatog se Timanem megpelowà kandin lekat te kemetayun. So ibeg i Jesus tomolò, yan se doun te nenenalan se Timanem kandin.

⁸Pengkey Batà te Timanem si Jesus, meneng mig-iling sikandin timolò te ibeg te Amay din pineokit te pegtayod din te kelimahan dimateng kandin.

⁹Pineokit te pegtayod din te kedita niyan, impetaga-taga din te ontò sikandin timolò, aw yan neinang sikandin Egpelowà te kedita te otaw tomolò kandin, amon begayan din dan te kaling pedowan wedad temanan.

¹⁰Neinang sikandin Egpelowà, so ginulal sikandin te Timanem Telekagon tadon, iling te pegkagon i Melkisedec gebii.

¹¹Nayan, doen pa dakel isolat ko peden kenyo tepad te pegkagon i Melkisedec aw si Jesus, meneng melima se pegpetaga-taga ko kenyo tepad kenyan so wedad den nael ibeg niyo menenalan.

¹²So nenamay kaw den migpesakop diyà ki Cristo, yan biyasa kaw den peden megtoladà te doma otaw. Meneng sikiyo se keilangan todà toledaan te tagnà intoladà kenyo lekat te kagi te Timanem. Iling kaw te batà olò egsoso aw eked pa pekekaen te pengelapen.

¹³Iling te batà egsoso se otaw wedà pa peg-iling te keilangan meg-inang dan te metòlid.

¹⁴Meneng mekekaen se otaw metesan te pengelapen. Metesan den se otaw ontò den biyasa egtaking te mèpiya aw egkulu te medaet.