Ibraawe 5

1

2

3

4

5

6

7

8

9

10

11

12

13

¹Qeeseta halaqa gidi shuumetizadey daro asa giddofe doorettessinne asa gish gididi imotanne nagara gish yarsho shiishshanaas doorettes.

²Izikka ba baggara daburancha gidida gish eronta asatasinne oge balidaytas qadhettana dandayees.

³Izi ba nagara gishshinne hara asata nagara gish yarsho shiishshanaas izas bessizay hessa gishassa.

⁴Aaroney xeeygetidayssatho izi Xoossi xeygidade gidanas bessees attin hessa he bonchoza barka baas ekkizadey deenna.

⁵Hessathoka Kirstoosi Qeeseta halaqa gidana boncho barka baas ekkibenna. Gido attin “Ne ta naakko; ta nees hach Aawa gidadis” gida Xoossafe ekides.

⁶Hessathoka harason “Malkexeedeqe shuumeta mala neni mernas Qeeseta halaqa” gees.

⁷Yesusi hayssa biitta bolla diza wode iza hayqoppe ashshana dandayizayssakko afunxishe gita qaalara woosa woossides. Addafe ashketethara izi azazettida gish iza woossa Xoossi siyides.

⁸Izi Xoossa Naa gidikkokka ba ekkida waayezappe azazeteth tamarides.

⁹Hessa baggara pacey bayndade gidi beettidayssafe guye bana azazettizaytas ubbaas merna atotethas gaaso gidides.

¹⁰Malkexeedeqe shuumetetha mala Qeeseta halaqa geetetti Xoossan shuumettides.

¹¹Hessa gish nu haasayana miishi buro daroy dees. Gido attin inte dota7ata gidida gish intena erisoy meto.

¹²Inte hanni wode astamare gidanas bessishin Xoossa qaala buro koyroppe denthidi intena tamarsiza as intes koshshees. Intes koshshizay mino kath gidonta maatha.

¹³Maath paahettizay qii guutha naa gidiza gish lo7onne iita shaakkiza timirte shaakki erenna.

¹⁴Mino kath gidikko lo7onne iita shaakkanas banateththa dosisida wozna kunthida asatassa.