1Dojekhe nekbaredere rašas kidel avri o Del le manušendar a ačhavel les andre peskeri služba prekal o manuša, hoj te anel o dari the o obeti vaš o bini.
2Vašoda, hoj the les hin slabišagi, šaj el kovlejileskero ke ola manuša, saven nane prindžaripen a hine odcirdle avrether.
3Vašoda ov mušinel te anel o obeti na ča vaš le manušengere bini, ale the vaš peskere.
4Ňiko korkoro peske našťi lel odi pačiv, bo ča o Del kidel avri le nekbareder rašaj, avke sar kidňa avri le Aron.
5Avke aňi o Kristus peske na iľa korkoro odi pačiv, hoj ačhela Nekbareder Rašaj, ale o Del leske phenďa: “Tu sal miro Čhavo, adadžives ačhiľom tiro Dad.”
6A sar pre aver than phenel: “Tu sal rašaj pro furt avke sar o Melchisedek.”
7O Ježiš andre ola dživesa, sar dživelas pre phuv, le zorale hangoha the le apsenca anelas peskere mangipena the modľitbi Oleske, ko les šaj zachraňinďa le meribnastar. A sas the avrišundo vašoda, bo sas poddino le Devleske.
8Choc ov sas o Čhavo, prekal peskere cerpišagi sikľiľa te šunel le Dades,
9a vašoda, hoj ačhiľa dokonalo, ov hin oda, kastar avel o večno spaseňje prekal savore, save les šunen,
10a o Del pal leste phenďa, hoj hino o Nekbareder Rašaj avke sar o Melchisedek.
11Diňahas pes pal oda mek but te vakerel, ale phares oda hin te phenel avke, hoj te achaľon, bo san leňive te šunel.
12Pal kajci časos tumen imar šaj uľanas učiťeľa, ale pale tumenge kampel, hoj tumen vareko te sikavel ola ešebne zakladi le Devleskere lavendar. Bo mek furt san ajse, kaske kampel thud a na o zoralo chaben.
13Bo kaske kampel thud, oda mek na achaľol, so hin čačes lačho a so na, bo mek hino čhavoro.
14O zoralo chaben hin prekal o dospele, save sikľonas oleha, so pregele andro dživipen, te rozprindžarel, so hin lačho a so na.
