1Mâreŋŋic nâŋâcnaonec taha bapa sâko rowosâec‐jopakicne sasawa jaŋe ŋic jaŋere erâ Anutu fuacnehuc kiŋ bahacte taha bâzi rikecneniŋte râec‐jopakicne.
2Taha bapa iŋucne e jahac ŋic dodocne jukacte ŋic mutucne â qâsoriekicne sâcne urucne ejareekac.
3Erâ fuŋne iŋucte ŋic jaŋere kiŋ bahacte mecne â e jahacne mâmâc taha bâzi rikeocte mukicne.
4Gie fekicne i ŋic moczi maŋticnere mi rorâ bapane, taha bapa ŋic moc e Anutuzi rowosâerâ gie mucneme sâcne baocmu, Aroŋ iŋuc hâcne ecnewec.
5Eme Kristo e iŋuc jaha e jahacne maname fefene eha taha bapa sâko mi ewec, i Anutuzi ʒiŋuc muhuc mucnewec: “Go hâcne Ŋokâ‐nane, no miŋecgac bâfuacgukopac.”
6Erâ dâŋ moc ʒiŋuc muwec: “Goki Melikisede ere sâcko taha bapa juraʒihuc jucmu sanaŋ.”
7Jesu e mâreŋko juwec dameŋ ira, hâmockonec bataraocte tâpiri focnewec, erao numuhuc kio wâwâsic kâcɋene ecnewec. Ehuc Anutu araŋ bacnewecte manacnewec.
8E Ŋokâ juwec, erâ sifu ʒâic gie baku micrereŋte fuŋne mana tarawec.
9Erâ wiac emataucke‐fârerâ mume rereŋfâc‐ticne sasawa jaŋere bâbâpiaŋ tatara tâmiric bâfuawec.
10E hâcne taha bapa sâko erâ Melikisede ere sâcko juocte Anutuzi mucnewec.
11Irec dâŋ bocjaha fokac, erâ ŋoŋe hazecfâŋ juŋgopieŋte ŋaza mutâc epemurâ manape ŋemâckekac.
12Ŋoŋe dameŋ ʒora miti mana wareeŋgopieŋzi gâcne qazu‐jarepie sâckezac; eme iŋucne ŋoŋe miti maine i mocwâc qaqazu‐ŋarenere sâc eŋgopieŋ. Ŋoŋe nânâ sanaŋnere sâc aricne, susu nânâre sâc sawa juŋgopieŋ.
13Susu nâeŋgopieŋ jaŋe ine ɋiene mujarezo, iŋucnezi dâŋ fârine wemocko mana taraniŋmu?
14Nânâ sanaŋne i sokakicne jaŋere biŋe, maŋ mamanasu‐jeŋic fua tâcneme biaŋne â sâqocne mana wosâeeŋgopieŋ jaŋere biŋe hâcne.
