Hebrews 5

1

2

3

4

5

6

7

8

9

10

11

12

13

¹God mi uso embo da teda priest nembogamo kataburisira. Edo katabedo God mi uso jawo da embo kera arase sedo ungoda teda ititisira. Edo kera awodo ise God da yei wo mi rorou itido ira ungoda wasiri bebegae awasedo.

²Edo priest nembodiba awa goroba aera teta embo nenei goroba ae awodo ra awasedo umo edo gogo edo embo jiro ae edo wasiri bebegae edo era awa budo edo gogo edo itadira.

³Edo embo da wasiri biae da awa embo aera te umo daedo uso wasiri biae de da awa embo rorou awa itido ira.

⁴Edo embo da amemi umo umosuka priest nembodiba da buro awa adi sedo adi aera te God mi embo awa jawo sedo priest nembodiba da buro awa arase itadira teta God mi Aaron jawo sisira da awodo.

⁵Edo da awodo Keriso umo umosuka priest nembodiba da buro awa adi sedo aera te God mi uso yei sisira, “Imo awa naso mei na boroko iso imamo etena.”

⁶Edo ge nei eiawa God mi uso yei sisira, “Imo awa priest adesa teta Melchizedek awodo edo imo priest da buro awa ise matawa atadesa.”

⁷Edo Iesu busu da atisira ainde umo ji de jijiu de God da yei sedo gido isira umo betari da soregarase. Edo umo God da yei benunu awodo seuri God umo ingido isira ainda be awa umo God mi ro arase dipapa ira awawa adi dipapa nembodiba be edo isira awasedo.

⁸Edo Iesu awa God da mei na te umo memesi nembodiba burisira amimi etiri umo rawodo edo God kera ari ri awa gosisira.

⁹Edo umo memesi burisira amimi umo soregari embo ewamei be ewamei wasiri matawa atari awa embo umo kera edo era ainda yei itido ira embo awa isira.

¹⁰Edo umo priest da buro teta Melchizedek mi priest da buro edo isira awodo arase God mi umo priest nembodiba arase jawo sisira.

¹¹Nango ge jiwae einda jawo da sari dipapa era te ingoda jiro awa okain etiri edo ingo kiambu ro gae ewa awasedo nango mi ge eiawa ingoda yei ujugari awa okain be ira.

¹²Edo ingo iji ribori be God da ge ingewowa awasedo ingo mi embo nenei atopatae etewa te ingo God da ge awa kiambu gido gogowo ae awasedo ingo embo nenei mi God da ge da susu awawa ingoda yei atopatorase dipapa ewa. Edo ingo kaiema indae etewa awarate ingo emi indise atewa.

¹³Edo embo ave emi indera embo awa mei kiambu ra. Edo wasiri amomo ewa ta biae ri amone mei kiambu emi beda amone gaera.

¹⁴Edo embo ave bajido mei kiambu emi beda ari awa dodo ira embo awa wasiri amomo ewa ta biae ri awa gido ira. Edo embo awa teta God da ge tuda awawa indarago ise gadira.