Hebreos 5

1

2

3

4

5

6

7

8

9

10

11

12

13

¹Yogo' beṉe' ca' ba gosaque' bx̱oz blao c̱he nación Israel c̱hechon' gosac ḻo ne'e šjasesane' bi da' šjasesane' lao Diosen' na' gosote' beyix̱e' bosolalje' xc̱hengacba' cont Diosen' bezi'xene' xtoḻa' da' x̱ozxta'ocho ca'.

²Na' bx̱oz ca' gosape' yeḻa' chxenḻaže' len beṉe' biṉa' yesejni'i can' cheyaḻa' yesone' na' len beṉe' ba nx̱oayag da' malen' ḻegaque', ḻe ḻecze beṉac̱h beṉe' güen da' xiṉj ḻegaque'.

³Da'nan' benen byen bx̱oz ca' gosote' beyix̱e' na' bosolalje' xc̱hemba' cont goseṉabe' yezi'xen Diosen' xtoḻen' lente xtoḻa' yezica'chle beṉe'.

⁴Na' ṉe to bx̱oz ca' bi benxen cuine' ṉeca gwlej cuine' cont gaque' bx̱oz blao, san Diosen' gwleje' to toe' gosaque' bx̱oz blao can' gwleje' da' Aarón.

⁵Na' ca'cze goc len Criston', bitw beyiljue' nac gone' cont gacxene', ṉeca gwlej cuine' cont naque' bx̱oz blao c̱hecho, san Diosen' gwleje'ne' na' gože'ne': Len' naco' Xi'iṉa', ṉa'aža ba bena' cont nacbia' zoaczo'.

⁶Na' ga yoble nyoj yeto da' gwne': Naco' bx̱oz toḻi tocaṉe can' nac bx̱oz ben' le' Melquisedec.

⁷Na' Criston' šlac gwzoe' yežlion' boḻ güiže' X̱e' Diosen' ben' nape' yeḻa' guac cont yosle' ḻe' bi gate', gwṉe' zižje na' gwcheže' gwṉabe' gaclene' ḻe'. Na' da' bzex̱jw yic̱hj Criston' bene' con can' gwna X̱en', na' X̱e' Diosen' bzenague' na' goclene'ne' cont bi bžebe' yeḻa' goten'.

⁸Na' ḻa'czḻa' Criston' naque' Xi'iṉ Dios, bžaglagüe' yogo'ḻoḻ da' ca' goc c̱he' cate' bzenague' c̱he Diosen' cont gwyejni'ide' can' chac c̱he chio' beṉac̱h.

⁹Na' beyož goc c̱he' yogo'ḻoḻ da' goclaže' Diosen', nach ba guaque' gwnežjue' yeḻa' mban toḻi tocaṉe c̱he yogo' beṉe' yosozenague' c̱he'.

¹⁰Can' naquen, Diosen' gwleje' ḻe' cont naque' bx̱oz blao c̱hecho, na' naque' ca bx̱oz Melquisedec.

¹¹Na' ṉe' de da' zan da' chaclaža' ṉia' le'e c̱he da' ngan', perw naquen zdebe ṉian' ca šejni'ilen, ḻe bich chebele šejni'ilen.

¹²Ba goḻe' gwzejni'ile beṉe' xtiža' Diosen', perw gualaz da' gonḻe ca', chyažjele no yozejni'i le'e da' yoble da' ca' bsedle da' nechw. Da'nan' zaca'leble ca to bidao' biṉa' gac gagw na' con chaže'be'.

¹³Na' beṉe' zjanac ca to bidao' ṉe' chaže', biṉa' yesejni'ide' xtiža' Diosen' binḻo cont yesone' da' zej to licha len Diosen'.

¹⁴Na' dan' ža xtiža' Diosen' da' naquech zdebe, zaca'leben ca yeḻa' guagw da' chagw beṉe' gole. Na' beṉe' chesejni'i ḻenṉa' chesacbe'ede' še to da' yesende' o to da' yesone' naquen güen o naquen mal, ḻe ba zjayolagüe' chosozenague' c̱he Diosen'.