Hebreo 13

1

2

3

4

5

6

7

8

9

10

11

12

13

¹Keilangan gayed dakel se pedowan niyo diyà te menge doma otaw egpemenal.

²Ikà niyo egkelibel te keilangan megsagman kaw te otaw mepanaw, pengkey wedà niyo kilelai. Liyag kaw kandan, so doen migsagman te otaw minapit doton kandan, meneng wedà dan ketaga-taga te menge anghil se minapit doton kandan.

³Ikà niyo egkelibel te keilangan megtabang kaw te menge otaw egpemenal kineleboso. Peg-ipat kaw kandan iling te sikiyo heman se kineleboso sipat kandan. Keilangan megtabang kaw heman te menge otaw egpemenal pinemilang iling te sikiyo heman se pinemilang sipat kandan.

⁴Keilangan meg-aneng-aneng se kedita te otaw te meelagà se pegkelobos te pedowan te teleesawa. Keilangan wedad otaw lomakad te kandin esawa, so megpelumun se Timanem te kedita te otaw lomakad aw lomayok te kenà kandin esawa.

⁵Ikà niyo egpengewarta. Keilangan meluba kaw te kedònan neabat niyo, so minikagi se Timanem, “Eked a palos tanan kenyo. Eked a palos lowat kenyo.”

⁶So Timanem se egseligan tadon, yan mekeikagi kidon, “Pengolo ko se megtabang kanak, aw yan eked a kelemitan, pengkey eden se inangen te otaw kanak.”

⁷Ikà niyo egkelibel te menge egpengibing te simbahan migtoladà kenyo te kagi te Timanem kedengan. Peg-aneng-aneng kaw tepad te mèpiya ininang dan te wedà dan pa kematay, aw peg-iling kaw te pegpemenal dan.

⁸Eked palos ketodà si Jesu Cristo, so gayed sikandin onawa, pengkey gebii, pengkey songkani, pengkey te wedad temanan.

⁹Aw doen otaw megtoladà kenyo te sebad kemolò toladà kenà iling te kebenalan tapay intoladà diyà kenyo, ikà niyo egpemenal kenyan. Pineokit te tabang te Timanem, melobos se pegsalig tadon diyà kandin. Eked kelobos se pegsalig tadon diyà kandin pineokit te pegtolò tadon te menge punù ipegtoladà dan tepad te kànen tadon, so kenà egketebangan se menge otaw egtolò te menge punù sìyan.

¹⁰Nematay si Jesus amon beyadan din se salà te kedita tadon nemenal kandin. Meneng se kedita te otaw egtaking te punù ingkeliwat i Moises tepad te pegpengimatay te ayam-ayam doton te simbahan te Judiyo, eked dan pekeakop diyà te kedita tadon impelowà i Jesus lekat te salà.

¹¹Aw imetayan te pengolo te simbahan te Judiyo se ayam-ayam tandà te salà ininang te otaw, ibingen din se dipanog niyan doton didalem te Ontò Tambì doton te simbahan dan. Meneng ibingen dan se lawa te sìyan ayam-ayam inimetayan doton te lowà te lonsod dan aw sonogen dan iyan kidoen.

¹²Iling heman kenyan se neinang diyà ki Jesus, so inimetayan heman sikandin doton te lowà te lonsod, aw dipanog din se inlinis te salà te otaw.

¹³Yan, impelowà kidon den lekat te menge punù ingkeliwat i Moises. Keilangan tenanan tadon se kedita niyan aw tomaking kidon te Pengolo tadon nematay doton te lowà te lonsod. Keilangan eked kidon kelemitan aw pemilangen kidon tandà te pegtaking tadon kandin, so pinemilang heman sikandin.

¹⁴Meketayod kidon kenyan so eked kidon peg-ogpà dini te keneyonan te wedad temanan. Meneng doen pa lonsod egpelimanan tadon ogpaan doton te langit te wedad temanan.

¹⁵Doen den keilangan ibegay tadon diyà te Timanem pineokit ki Jesus, aw yan se pegduyun tadon te Timanem te wedad temanan. Keilangan gayed kidon megpetaga-taga te egpesiontong kidon diyà kandin.

¹⁶Ikà niyo heman egkelibel te keilangan mèpiya se eg-inangen niyo, aw keilangan megtabang kaw te doma niyo nelimahan, so meluba se Timanem kenyo pineokit kenyan.

¹⁷Tolò kaw te menge egpengibing te simbahan. Pegsagman kaw kandan, so insogò dan te Timanem amon meg-ipat dan kenyo. Keilangan keseligan dan, so doen aldaw te okomen dan te Timanem. Aw megsagman kaw kandan, meluba se pedowan dan. Meneng aw eked kaw pegsagman kandan, mepuluk se pedowan dan, aw wedad heman ontong kinewaen niyo.

¹⁸Pegtawal-tawal kaw diyà te Timanem tepad kenami. Netegahan day te wedad ininang day mepakay silahen, aw tod day wedad palos inangen day eked duyuni te Timanem.

¹⁹Ontò ko ibeg, megtawal-tawal kaw diyà te Timanem te mekelikò a doton kenyo te eked kenamay.

²⁰Inantay te Timanem se Pengolo tadon si Jesus lekat te nematay, so pineokit te pegkematay din, ininang din se kaling peokit amon mekepedapag kidon diyà kandin te wedad temanan. Iling sikandin te Telediyaga tadon, so iling kidon te menge karniro eg-ipaten din.

²¹Yan se doun te egtawal-tawal a diyà te Timanem egpemegay te kelinaw te begayan kaw te kedita te mèpiya tabang din amon mekebatog kaw tomoman te ibeg din. Ibeg ko heman, tebangan kaw din amon meg-inang kaw te mekeluba kandin pineokit te tabang i Jesu Cristo diyà kenyo. Iduyun sikandin te wedad temanan. Metoman iyan.

²²Menge kedowa ko, ibeg ko menenalan kaw te kedita te insolat ko den diyà kenyo amon ketebangan kaw, so pilabok se kagi ko kenyo seini.

²³Ibeg ko metaga-taga kaw te impelowà den se kedowa tadon si Timoteo lekat te keleboso. Aw domateng sikandin te eked kenamay, ipetaking ko sikandin aw domoton a kenyo.

²⁴Indani niyo se kedita te egpengibing te simbahan aw kedita te doma niyo sakop te Timanem te eg-aneng-aneng a heman kandan. Ibeg te menge tege Italya, metaga-taga kaw heman te eg-aneng-aneng dan kenyo.

²⁵Ibeg ko megtabang se Timanem te kedita niyo. Metoman iyan.