Hibru 5

1

2

3

4

5

6

7

8

9

10

11

12

13

¹Lipu hananiangam mugamugangam longgalo, ding lipuadi Urana mogudi liwe mana lipudi. Mogu taining tainina ba li liwe mana Urana xaung lipudi, bu wa lipuxiding aningoxama, sina yahangadi xaung hananiangadi na mana lipudi kuboluding diandi.

²Lipu hananiangam mugamugangama sanga ba libu kubolu xaringana na lipudi hatumingadingdi dirabang, namua na kubolu haringing teguama xap xauna.

³Namua naga bing hanania mana ing sibung kubolung diandi xaung dingiadi xauna.

⁴Baing lipu tela xap yaya sabangga ba ranguaina te. Tegu. Urana wagi mana oxata ba, bila wagi Aron waleu sibuna.

⁵Baing Kristo bila ba xauna. Iti yanoa ba xap lipu hananiangam mugamugangam oxatanoa te. Tegu. Urana naga mogu, harua na ba, “Ung Garagua, hatata ngasok Tibum.” 

⁶Baing Xuang hataing tela harua ba, “Ung guwa lipu hananiangam bungingbunginalo, maxang taininau bila Melkisadek.” 

⁷Bungina Yesu wa titia li, sabu haringina xaung maxang langindi diri, xaung wagi mana Urana ina haringinganoa sanga mana xap muli sangua matiyua, saing Urana lungu, namua na tatuaina xaung wa hawa mana.

⁸Maxuna, ina Urana Garanoa, ning xap salaga, saing bila balau xabia sibuna mana kubolua su mana Urana haruanganoa.

⁹Baing bila balau Urana hatanga ba Yesu maringing sibuna, sanga sibuna ba sok namu mana Urana xap muli lipu gaxarea disu mana haruanganoa, bu duwa xai bungingbunginalo.

¹⁰Binabu Urana mogu ba sok lipu hananiangam mugamugangama, maxang taininau bila Melkisadek.

¹¹Am haruangamam xumana ba am gabaxanga mana Kristo bila Melkisadek, ne makasa mana am gabaxanga namua na axap xabiangua sap te.

¹²Namua na ahatum haringina mana Kristo bunging maxaxaya masup, sanga mana atubatuba lipu teladi, baing tegu! Ahixiyauyu mana lipu tela ba tubatubang mana Urana Xuang maxaniagindi muli. Ang ba bila gara kambagindi sanga ba daxang anginga haringina te. Abo ba anam ing ganina!

¹³Namua na lipu gaxarea nam ing ganina wa gara kambaginauyu. Xabianganoa raxap mana Urana daxangang kubolu maringinama.

¹⁴Ning anginga haringina sanga mana lipu haringindi. Ding lipuadi bungingbunginalo ditubatuba hatumingadingdi ba disu mana kuboluadi Urana muruna manadi. Bila balau daxabia xai sibuna ba disuxuya kuboluadi daxai xaung kuboluadi didoa.