HEBREOS 5

1

2

3

4

5

6

7

8

9

10

11

12

13

¹Dios ẕbekze' no benne' žénele' ladjw benách ka', nich gake' bx̱oz blo, na' ẕzoe' ḻe' nich gone' da' ka' žone' ḻaw Dios ḻo wlazgak benách ka', na' nich wdíe' ḻaw Dios da' ka' ẕnéẕjwgake', na' bia yix̱e' ka' žótgake' ḻo bkog la'y ni'a che doḻa' da' zej nbage'e.

²Bx̱oz blon', dan' žak chie' tḻebe kan žaken chegak yógo'te benách ka', gak gake' ẕen ḻaže' ḻen benne' bi nnezle ka', benne' ka' ẕchíx̱gekle'.

³Dan' nak bx̱oz blon' benachze, che ḻen žaḻa' wdíe' ḻaw Dios to bia yix̱e', bian' gote' ḻo bkog la'y, ni'a che doḻa' da' nbága'kze' ḻe', kan žone' ni'a che doḻa' da' zej nbaga' benách ka'.

⁴Bi gak nitó benne' gon kwine' bx̱oz blo, san Dios ẕbie' no benne' žaḻa' gake' bx̱oz blo, kan wžíe' Aarón, bennen' goke' bx̱oz blo nežw.

⁵Ḻezka' goken che Benne' Criston', bi ben kwine' Bx̱oz Blo, san Dios bzoe' Ḻe' Bx̱oz Blo. Kan nak da' ni, Dios gože' Ḻe': Le' nako' Ẕi'na'. Bzoa' Le' na'a.

⁶Ḻezka' gože' Ḻe' kan nyejw ga yoble, katen' wnné': Le' náktezo' Bx̱oz, kan gok Melkisedek bx̱oz.

⁷Benne' Criston', katen' wzoakze' yežlyó nga, bcháḻjḻene' Dios, na' góta'yoele' Ḻe'. Wžéžeyi'e, na' wžeže' ḻaw Dios, Bennen' gok yeslé' Ḻe' ḻo yeḻa' got, na' Dios benle' chie' dan' bžebe' Dios dot ḻaže'e.

⁸Ḻa'kze goke' Ẕi'n Dios, bsedle' gone' kan ẕnna x̱tiža' Dios ni'a che da' ka' gókgaken chie', da' ka' wẕake'e.

⁹Katen' ba gok Benne' Criston' dot kan žaḻa' gak Bx̱oz Blo, na' Dios bene' Ḻe' Benne' žeslé' to chi'ize yógo'te benne' ka' žóngake' kan ẕnna x̱tiže'e.

¹⁰Naž Dios bzoe' Ḻe' Bx̱oz Blo kan gok Melkisedek na' bx̱oz blo.

¹¹Kan nak da' ni, žaḻa' wcháḻjḻento' ḻe'e da' zan, dan' naken zede wzejni'ilto' ḻe'e, dan' bi na' chejní'ilele.

¹²Ba wdé ža žaḻa' gak wsédlele ḻe'e benách ka' x̱tiža' Dios, dan' ba bénlele scha, san žon byenen no benne' wsedle' ḻe'e da' yoble da' bi naken zede dan' ba nzi' ḻo na' no benne' ẕzo ḻawe' žejḻi'e che Benne' Criston'. Nga'nle ka to x̱kwide' že'ndo', bi'don' ne žáẕe'be' niže', na' bi gak gawbe' yeḻa' waw choch.

¹³No benne' žon byenen soa no benne' wsedle' ḻe' da' bi naken zede, nake' ka to x̱kwide' ne žáẕe'be' niže'. Bi nsedle' kan nak tḻebe ḻen da' naken chawe'.

¹⁴Yeḻa' waw choch naken da' žawgak benne' ka' ba zej nake' benne' waḻe ka', benne' ka' žónbia'gekle' da' naken chawe', na' da' bi naken chawe', dan' ba bkóngekle' žin yeḻa' žejní'il chégake'.