Hebre 5

1

2

3

4

5

6

7

8

9

10

11

12

13

¹Hkyangjong mó yuq hkangmó gi, byu pê chyáng mai hkyin htoq yû huî é nghut mù, mara pê é matú, chyunghuq pé eq hkungga pé nhông byi hkyô nghut é, Garai Gasang eq sêng é muzó pé má, yhangmoq é gunglik dông, hkyin masat to huî é bang nghut akô.

²Yhânggùng yhang gi, wum nyhóm hkyo é a-ô má nghut nyi é yanmai, yhang gi, bun a bóng é eq hkyô nghoq ló é bang lé nú-nhâm é dông wó shuî-û é nghut lhê.

³Wum nyhôm é yanmai, yhang gi, byu pê é marâ é matú le, yhânggùng yhâng é marâ é matú le, hkungga nhông byi râ dut é nghut lhê.

⁴Ó yuq le, yhumsing gùng yhumsîng aróng haû lé wó yu é a nghut; Arun lé su, Garai Gasâng èq wut yu é hui jáng sheq wó é nghut lhê.

⁵Haû eq rajung za, Hkrisduq le, hkyangjong mó dut lo é hpungwup shingkang lé, Yhânggùng yhang kut yu é a nghut. Garai Gasang sheq, Yhang lé, "Nàng gi, Ngá Zo nghut ri; Ngò, hkû-nyí Náng Wa dut bê nghut lhê." ga taî é nghut lhê.

⁶Hau htoq agó, "Nàng gi, Melahkizedek wó é hkyangjong ayá hkyô dông mai ahtum abyuq hkyangjong rayuq nghut nyi ri." ga, gó wô má le, Yhang taî to ashî nghut ri.

⁷Yesuq gi, myidàm htoq má asak dui nyi é buinyì pé má, Yhang lé, shi é mai wó hkyi yù Su chyáng, ngaubyi ngau-nhap eq wut garû é èq, kyûdung é eq dung tôngbán bê nghut mù, Yhâng é hkungga gíng é ap nóng hkyo é yanmai, gyo byî é hui bê nghut ri.

⁸Yhang gi, Zo rayuq nghut to kôle, Yhang hui zô é wuîhke jamjau hkyô mai jìno gyo hkyô wó mhoq yû bê nghut ri.

⁹Yhang gi, lhoq gumjup huî é hkûn, Yhang é jìno gyo bang banshoq é matú, ahtum abyuq é hkyi yù hkyo é awang dut byuq bê nghut é eq,

¹⁰Melahkizedek wó é hkyangjong ayá hkyô dông mai hkyangjong mó dut râ matú, Garai Gasâng èq hkyin masat é hui bê sû nghut ri.

¹¹Ngamoq gi, shí hkyô eq séng luî taí râ gyai joq lhê; nghut kôlhang, nungmoq gi, ra luì za a sê gyô é bang nghut kô é yanmai, taî sân kyo wuî ri.

¹²Gè gè ga jáng, ahkui lhê ahkyíng má, nungmoq gi, sará dut gíng bê bang nghut lhê; nghut kôlhang, Garai Gasâng é mungdang mâ é tengmán hkyo é awang lé, rayuq yuq èq nungmoq lé dum taû mhoq byi râ ru dut nyi akô nghut ri. Nungmoq gi, htan é zoshuq râ é bang a nghut, naú wing râ é bang ru nghut nyi ashî kó myhi-nhung!

¹³Naú wing shuq râ é sû ó yuq le, zonú nghut nyi ashî mù, dingmán é hkyô lé mhoqshit é má a mán shi nghut ri.

¹⁴Nghut kôlhang, htan é zoshuq gi, ge é hkyô eq agè ashop é hkyô lé wó sê gam hkoq yû shoq, hkâ-nhám le yhumsing gùng yhumsîng lhoq mhân yu nyi é, kô dìng bê bâng é matú ru nghut lhê.