Filemón 1

1

¹Riꞌin in Pablo, in kꞌo pa cárcel ruma kintzijon puwi ri Qanimajawal Jesucristo. Junam rukꞌ ri hermano Timoteo kaqataq bꞌi wa carta cheꞌla Filemón, ri na loqꞌ ta kꞌax kanaꞌw e la yey lal qachbꞌiꞌil chupa ruchak ri Dios.

²Kaqaya pan rutzil kiwach ri hermana Apia y ri hermano Arquipo, ri qachbꞌiꞌil lik uyaꞌom ribꞌ che uꞌanik ruchak ri Dios, yey kaqaya pan rutzil kiwach ri hermanos kakimol kibꞌ pa ocho la.

³Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.

⁴Echiriꞌ kanꞌan orar, xaqi kakꞌun la chi nukꞌuꞌx y kintioxin kꞌu che ri Nuqaw Dios uma rilal.

⁵Ma nutom lik kꞌax kanaꞌ la ri Qanimajawal Jesucristo y lik kubꞌul kꞌuꞌx la rukꞌ yey kakꞌut la ri rutzil kꞌuꞌx la chike konoje ri kikojom rubꞌiꞌ.

⁶Ekꞌu ri kuaj riꞌin e ketaꞌmaj la ronoje ri utz yaꞌtal paqaqꞌabꞌ kaqaꞌano ruma xa oj jun rukꞌ ri Cristo, chaꞌ jelaꞌ ri kubꞌulibꞌal kꞌuꞌx la rukꞌ Rire kꞌo kutiqoj chike jujun chik.

⁷Hermano, riꞌoj lik kojkiꞌkotik y lik nimarinaq qakꞌuꞌx ruma ri rutzil kꞌuꞌxaj kꞌutum la chike ri kikojom rubꞌiꞌ ri Cristo, ma rukꞌ waꞌ kowirinaq kikꞌuꞌx rike.

⁸E uwariꞌche, kꞌo kuaj kantzꞌonoj ko cheꞌla. Tobꞌ ri Cristo uyaꞌom panuqꞌabꞌ riꞌin kantaq la che uꞌanik ri lik ubꞌe, na kanꞌan ta waꞌ;

⁹ekꞌu ri kanꞌano e kinelaj ko cheꞌla ruma ri rutzil kꞌuꞌx la wukꞌ. Riꞌin in Pablo, in chi nimalaj winaq, yey woꞌora in kꞌo pa cárcel ruma kintzijon puwi ri Cristo;

¹⁰kinchꞌaw ko chiwach la puwi ri Onésimo. Rire woꞌora e nukꞌajol chupa rubꞌiꞌ ri Cristo, ma wuma riꞌin, rire xukoj rubꞌiꞌ ri Cristo wara pa wa cárcel.

¹¹E ri petinaq loq, ri Onésimo e jun aj chak la na xuꞌan ta utzilaj toꞌbꞌel cheꞌla, noꞌj woꞌora e jun utzilaj toꞌbꞌel che rilal y jenelaꞌ chwe riꞌin.

¹²Rire lik ukꞌuꞌx wanimaꞌ; na rukꞌ ta kꞌu riꞌ, kantaq tanchi ubꞌi cheꞌla,

¹³tobꞌ lik kuaj riꞌin kakꞌojiꞌ wukꞌ pakꞌaxel rilal chaꞌ kinutoꞌo janipa chi qꞌij in kꞌo pa cárcel ruma kantzijoj ri Utzilaj Tzij.

¹⁴Pero na jinta kꞌo xuaj xinꞌan xa chirij wiꞌ la. We kaꞌan la wa kantzꞌonoj cheꞌla, na kuaj taj kaꞌan la waꞌ ruma kantaq la che, ma e ri kuaj riꞌin e kaꞌan la waꞌ ruma lik kalax pa animaꞌ la.

¹⁵Laj kꞌo ne xutiqoj ri xrikꞌowibꞌej ri Onésimo, ma tobꞌ rire xel ukꞌ la jujun qꞌij, ekꞌu riꞌ woꞌora na xa ta chi ajilam qꞌij kakꞌojiꞌ ukꞌ la

¹⁶re toꞌbꞌel e la, yey rire e jun hermano na loqꞌ ta kꞌax kanaꞌw re. Riꞌin lik kꞌax kannaꞌo yey woꞌora más ne kꞌax kanaꞌ rilal, ma e toꞌbꞌel e la, yey rilal rukꞌ rire chaqꞌ ibꞌ alaq chupa rubꞌiꞌ ri Qanimajawal.

¹⁷E uwariꞌche, we kunaꞌ kꞌuꞌx la junam qachbꞌiꞌil qibꞌ chupa ruchak ri Qanimajawal Jesucristo, kꞌulu kꞌu la ri Onésimo pachaꞌ e riꞌin ri kinkꞌul la.

¹⁸We rire kꞌo uꞌanom cheꞌla o we kꞌo ukꞌas ukꞌ la, kojo la wa kꞌas pa nubꞌiꞌ riꞌin y jelaꞌ kantoj cheꞌla.

¹⁹Riꞌin in Pablo, in kintzꞌibꞌan re waꞌ rukꞌ ri nuqꞌabꞌ: In kintojow re rukꞌas. Na kajawax tane kꞌut kankuxtaj ri kꞌas rilal wukꞌ riꞌin, ma wuma riꞌin xriq la ri kꞌaslemal chwach ri Dios, tobꞌ waꞌ na kantzꞌonoj taj katoj la chwe.

²⁰Hermano, ruma kꞌax kanaꞌ la ri Qanimajawal; ꞌana ko la wa kantzꞌonoj cheꞌla. Nimarisaj kꞌu la ri nukꞌuꞌx rukꞌ wa kaꞌan la che ri Onésimo.

²¹Kintzꞌibꞌan pan ukꞌ la rukꞌ kubꞌulibꞌal nukꞌuꞌx, ma wetaꞌam kikꞌow ne uwiꞌ ri kaꞌan la chwa wa kantzꞌonoj cheꞌla.

²²Yijbꞌaꞌ kꞌu pan la juna luwar pa kinkꞌojiꞌ wi, ma kubꞌul nukꞌuꞌx kinopon tanchi ukꞌ la, we ri Dios kuya luwar kinel bꞌi pa wa cárcel pachaꞌ ri tzꞌonom alaq panuwiꞌ chwach Rire.

²³Ri Epafras, ri wachbꞌiꞌil wara pa oj tzꞌapil wi ruma oj re ri Qanimajawal Jesucristo, kuya pan rutzil wach la.

²⁴Jenelaꞌ, kakiya pan rutzil wach la ri Marcos, ri Aristarco, ri Demas y ri Lucas, ri e wachbꞌiꞌil chupa ruchak ri Qaqaw.

²⁵Kꞌola kꞌu pa animaꞌ alaq ri unimal rutzil ukꞌuꞌx ri Qanimajawal Jesucristo. Amén.